Mintzalagun egitasmoan izena eman daiteke
Mintzalagun egitasmoa aurrera doa Pasaian, hirugarrenez. Une honetan, 20 talde eta 80 pertsona ari dira astero euskara praktikatzen, 19 boluntariorekin.
Mintzalagun egitasmoa aurrera doa Pasaian, hirugarrenez. Pasaiako Udala eta bi euskaltegiak, elkarlanean, euskararen praktika sustatzen duen egitasmoa zabaltzen ari dira. Ikasturteko lehenengo hilabeteetako emaitzak “bikainak” izaten ari direla adierazi du udalak, 20 talde eta 80 ikasle ari baitira astero euskara praktikatzen. Orotara, 19 boluntario ari dira jardunean euskara hobetu nahi duten pasaitarrekin. “Giro lasaian, estutasunik gabe, euskara kalera eramaten dute 80 lagun horiek”, esan du udalak.
Asteroko saioez gain, Mintzalagun egitasmoko parte hartzaileek kanpo ekintzak ere egiten dituzte. Horrez gain, Pasaian eta eskualdean euskaraz eskaintzen diren ikuskizun zein ikastaroetan parte hartzeko gonbidapena jasotzen dute Mintzalaguneko kideek.
Egitasmoa “oso arrakastatsua” izaten ari dela goratu du udalak, eta horrek adierazten du Pasaiako euskararen erabileran “aurrera” egin nahi dela. Programaren helburua da helduen arteko solasaldiak sortzea, kalean eta lagunartean erabiltzen den euskarari lehentasuna emanez eta egunerokotasunean erabilgarriak izan daitezkeen ereduak eta baliabideak erabiliz.
Urte berria hastearekin batera, udalak eta euskaltegiek bigarren matrikulazio kanpaina abiatu dute. Lanean ari diren 19 boluntarioak bidelagunak dira, eta euskara hobetu nahi dute pertsonak, bidelariak. Udalak gogorarazi du parte hartzaileek gutxieneko ezagutza maila bat behar dutela, bidelagunek euskara hutsez egin dezaten.
Izen emateak lau modutara egin daitezke: Pasaiako bi euskaltegietan, 688 64 71 59 telefonora deituta edo Whatsappa bidalita, helbide elektroniko bidez edota Pasaia eta Lezoko Mintzalagun blogean.
