Etxez etxeko iruzur saiakerak Pasaian
Batek Bake Epaitegiaren jakinarazpen faltsuekin du harremana; bestean, gizon bat diru edo etxetresna eske ari da, ustez gaixorik duen alabaren alde.
Pasaiako Udalak, Udaltzaingoaren bitartez, bi iruzur saiakeraren berri eman du. Antxon eta Trintxerpen etxez etxe ari dira iruzurgileak euren onurarako herritarrei maula egin nahian. Udalak herritarrak ohartarazi ditu jende ezezagunaren bisitaren bat izaten dutenean, informazioa egiazta dezatela.
Udaltzaingoak zehaztu duenez, iruzur ahaleginetako batek Bake Epaitegiaren jakinarazpenekin du harremana. Hala, ustezko justizia funtzionario bat etxeetara sartzen ahalegintzen ari da jakinarazpen bat emateko, funtzionarioaren nortasuna ordezkatzen ari da etxebizitzetara sartzeko.
Beste iruzur ahalegina Trintxerpeko hainbat bizilagunek salatutakoa izan da. Gizon bat, ustez gaixorik duen alabarentzat etxez etxe dirua edo etxeko tresnak eskatzen ari da. Udaltzaingoak adi egoteko eskatu die herritarrei, iruzur saiakera baita hori ere bai.
Hondakinen kanpaina
Bestalde, Pasaiako Udalak oroitarazi du hondakinen kanpaina berriarekin atzo (astelehena) hasi zela. Horren arabera, ingurumen hezitzaileek herriko etxe guztiak bisitatuko dituzte informazioa nahiz birziklatzeko materiala emateko. “Profesional horiek behar bezala identifikatuta joango dira, beren kredentzialekin eta udalaren baimenarekin”, zehaztu du udalak.
