Eltxoak uxatzeko produktua sortu dute Don Boscon
Egindakoa Peruko Goi Piura zonaldera bidaliko dute, han izan ziren uholdeengatik denge epidemia dutelako. GKE-ekin elkarlanean garatu dute egitasmoa.
Denge gaixotasunari aurre egiten ari dira Peruko Goi Piura zonaldean. Don Bosco LHII prestakuntza publikoko Kimika saileko Produktu Farmazeutiko, Bioteknologiako et Antzekoen Fabrikaziorako goi mailako prestakuntza zikloko bigarren mailako ikasleek eltxoak gizakietatik uxatzeko produktua egin dute. Egindakoa Perura bideratuko dute, han denge epidemiari aurre egiteko. Egoiazia eta Zabalketa gobernuz kanpoko erakundeekin (GKE) batera landu dute egitasmoa. Dengea eltxoen bitartez zabaltzen da, besteak beste.
Iaz uholdeak izan ziren Peruko Goi Piura zonaldean. Horren ondorioz, denge epidemia dute han. Hala, “benetako arazo bati erantzun azkar eta eraginkorra” emateko erronka hartu zuten lanbide hezkuntza zentroko ikasleek, “bokazio sozial eta solidario argia izan du egitasmoak” azaldu dute Don Boscotik. ETHAZI metodologia erabili dute uxatzailea sortzeko, erronketan oinarritutakoa hura. “Metodologia hori arrakastaz ezarrita dago ikastetxean duela zenbait urtetik”.
Egoaizia eta Zabalketa GKE-en bidez ikasleek jaki dute zein den Peruko zonalde horren errealitatea, eta horren jakitun landu dute eltxoei aurre egiteko produktua.
Garapena
Forma farmazeutiko likido eta erdi-solidoei buruzko beharrezko ezagutzak eskuratu ondoren, ikasleek eltxo uxatzaile proposamenak fabrikatu zituzten laborategi eskalan, eta aukeratutako formula bat sortu zuten eskala handian produktua egiteko. “Peruko baliabideak hemengoen berdinak ez direla kontuan hartuta, ikasleek Hego Amerikako lehengaietatik abiatuta landu daitezkeen uxatzeko formula alternatiboak ere landu dituzte. Gainera, lankidetzari esker, bideo-dei bat egin ahal izan da Peruko CIPCAko (Nekazarien Ikerketa eta Sustapenerako Zentroa) zuzendariarekin, eta proposamenean sortutako galderak eta zalantzak argitu ahal izan dira”, azaldu dute ikastetxetik.
Azkenik, Tecnaliak Azpeitian duen egoitzan dagoen bioefizientziako laborategira egindako bisita aprobetxatuz, ikasleek fabrikatutako formulen eraginkortasuna aztertzeko aukera izan zuten.
Erronkaren azken egunean, taldeek emaitzak aurkeztu zizkieten Egoaiziako eta Zabalketako kideei: denge epidemia Piura Garaian testuinguruan kokatzea, eltxo-uxatzaile ontziratua eta etiketatua, uxatzailearen formulazioa eta fabrikazio urratsak; baita Piurako herritarrei zuzendutako produktuaren prospektua eta komunikazio kanpaina ere (liburuxkak, abestiak, kartelak…). Erronkan sortutako ezagutza eta material guztia Egoaiziak eta Zabalketak jaso dute, Peruko lankideei helarazi eta erabili ahal izateko.
