Pentsioak izozteko "mehatxua" bete ez bada ere, lortzeko asko dute oraindik
Duintasunak hileko lehen asteleheneko protesta egin du eta mobilizatzen jarraitzeko asmoa berretsi du. HEL Herri Ekimen Legegilea babesteko sinadurak biltzen jarraitzen du pentsiodunen mugimenduak.
Duintasunaren otsaileko mobilizazioa. Pentsioen igoera berriro indarrean dagoelako pozik atera da Duintasuna kalera gaur. Izan ere, pentsioak izozteko “mehatxua” ez da bete, baina hala ere, haserre azaldu dira pentsiodunak, “gure pentsioak alderdien arteko eztabaidaren tresna bihurtu dituztenen arduragabekeria politikoa gorabehera 21/2021 legearen arabera adostutako igoera berriro indarrean dago”.
Zalantzarik ez du mugimenduak, kalera ateratzeko duen jarrera irmoa funtsezkoa izan dela “arazoa azkar konpontzeko”. Argi esan du enegarrenez Duintasunak, “ez dugu atzera pausu bakarra ere onartuko lortu dugunean, eta mobilizatzen jarraituko dugu galdutako erosteko ahalmena berreskuratzeko, gutxieneko pentsioak LGS Lanbidearteko Gutxieneko Soldatarekin parekatzeko, genero arrakala ezabatzeko, eta 2011tik egindako erreformen ondoren indarrean dauden murrizketak indargabetzeko”.
Marra gorrietako bat ez gainditzea lortu dutela diote harro, baina ez daude prest amore emateko, “oraindik egiteko asko dagoelako, eta lortu arte mobilizatzen jarraituko dugu”.
Eskerrak eman dizkie Duintasunak, halaber, gaurko protestan, gutxieneko pentsioak LGSraino osatzen dituen HEL Herri Ekimen Legegilea babestu eta sinatu duten herritar guztiei, “bi aste pasatxotan milaka sinadura jaso ditugu”. askoz gehiago behar dituzte, halere, “azken zazpi urtean gurekin mobilizatu diren milaka pertsona, pentsiodun, eta langileen konpromisoa sinadura bihurtu behar dugu”.
Euskal Herriko Pentsiodunen Mugimenduak bihar aurkeztuko du Bilboko Kafe Antzokian 18:00etan HELaren alde egindako manifestua, “beren gizarte eta lan eremuan bereziki esanguratsuak diren 280 pertsona baino gehiagok sinatu dute, eta bihar Bilboko ekitaldian emango dute horren berri”. Herri Ekimen Legegilea sinatzeko konpromiso-marea sortzeko deia egin du bukatzeko Duintasunak, “ahal bada, indar handiagoarekin jarraitzeko gure helburuak lortu arte”.
