Portuaren funtzionamendua hobetzeko proiektuak aztertu dituzte
Pasaiako Portu Agintaritzak Automobil eta Kamioi Fabrikatzaileen Espainiako Elkarteko eta Noatum-UECCko ibilgailuen terminaleko ordezkarien bisita jaso du gaur goizean.
Pasaiako Portu Agintaritzak (PPA) Automobil eta Kamioi Fabrikatzaileen Espainiako Elkarteko (ANFAC) eta Noatum-UECCko ibilgailuen terminaleko ordezkarien bisita jaso du gaur goizean. Epe labur eta ertainerako proiektuak aztertu dituzte, portuko jarduna hobetzeko eta sektore autoeragilearen logistika bultzatzeko helburuarekin.
PPAk 30 milioi euro inguru inbertituko ditu, eta proiektu berriak aurkeztu dizkie portuan izan diren ordezkariei. Besteak beste, Lezoko kanala handituko dute (23 milioi euro), errepideko sarbideak hobetuko dituzte (2 milioi euro), kanalean nabigatzea errazteko gaueko argiztapena jarriko dute (500.000 euro) edo Lezoko tren geltokia handituko dute (2,5 milioi euro). “Proiektu guztien helburua da portuko operatiba eta irisgarritasuna modu jasangarrian hobetzea, itsasoan, trenbidean eta errepideko garraioan”, esan du David Candelario PPAko zuzendariak.
Horrez gain, gaurko bisitan Pasaiako Portuaren iazko emaitzak ebaluatu dituzte. PPAk azaldu du portuak “beherakada txiki bat” izan duela balorazio orokorrean, 4,1etik 3,9ra jaitsi baita. Hala ere, estatuko balorazio onena jaso duten lau portuen artean mantendu da Pasaiakoa, Santander, Tarragona eta Saguntoren atzetik.
Trenbideko sarbideak, aduana izapideen arintasunak edo terminaletako biltegi eremuak esleitzeko kudeaketaren arintasunak “eragin negatiboa” izan dute portuaren balorazio orokorrean. Bestalde, proaktibitatea, errepideko irisgarritasuna edo Pasaiako Portuko zerbitzuaren malgutasuna izan dira hoberen baloratu diren puntuetako batzuk.
