Koxtapeko Hugo Ogallar Jimenez irabazle Gipuzkoako Ergometro Txapelketan
Hibaikako Aitor Legorburu Gomez izan da bigarrena Gazte Mailan, sanjuandarrak baino zazpi segundo gehiago behar izan zituen 2.000 metroak osatzeko.
Ogallar (Erdian) eta Legorburu (ezkerrean) sari banaketa ekitaldian. Gogorretik joan zen atzo Gipuzkoako Ergometro Txapelketa. Parte hartzaileen artean, Oarsoaldeko eta Bidasoko arraun kluben artetik, Hibaikak eta San Juan-Koxtapek baino ez zituzten ordezkariak izan lehia horretan. San Juan-Koxtapeko bakarrak, gainera, Gizonen Gazte Mailako Hugo Ogallar Jimenez, bere kategoriako txapeldun izan zen. Kategoria bereko bigarren postua, berriz, Hibaika Arraun Elkarteko aitor Legorburu Gomezentzat izan zen.
Nahikoa parekatuta hasi zuten lehia sanjuandarrak eta errenteriarrak, baina lehenak abantaila lortu eta gehiago izan zen. Bigarren postuari eutsi zion Legorburuk, eta postu horri zegokion dominarekin itzuli etxera.
Hibaikak beste zortzi ordezkari izan zituen atzoko lehian kategoria ezberdinetan. Dominarik ez zuten lortu baina ongi aritu ziren, lana gogorretik eginda.
Haur Nesken kategorian lehiatu ziren 23 arraunlarien artetik seigarren postuan sailkatu zen Hibaikako Haizea Maritxalar Mitxelena, lan bikaina eta erakustaldi ederra eginda. Kategoria bereko Irati Amorebieta Bergara hamabosgarren sailkatu zen.
Kadete kategoriako Hibaikako zazpi arraunlarik egin zuten atzoko desafioarekin bat. Lehiatzen lehenak mutilak izan ziren, eta 15 arraunlarien artean, bederatzigarren postua egin zuen Garai Aristi Zaratek; Adur Arranz Martinez, hamabigarren sailkatu zen; Hegoi Cobos Garbizu, hamahirugarren; eta Kenai Sanchez Martin, hamalaugarren.
Nesketan, bosgarren sailkatu zen Naroa Vallejo Castellvi; seigarren, Intza Ayala Vilar; eta bederatzigarren, Oihane Villarejo Sarasola.
Denbora guztiak hemen klik eginda kontsulta daitezke.
