Inauterietan, familia kalejaia
Oarsoirriakek antolatuta, Bixkor txarangak gidatuko du familien kalejaia.
Aurten ere argazki erraldoia egingo dute Herriko Plazan. Ez du hutsik egingo. Urtero bezala, familiei begirako hitzordua antolatu du Oarsoirriakek Inauterietarako. Martxoaren 1ean izango da familien kalejaia 12:00etan abiatuta Merkatuzarretik. Ibilbidean zehar lagun izango dute Bixkor txaranga gaztea; bide laburra du, baino, oparoa oso emanaldiz emanaldi baitabil. Behin ibilbidea bukatuta, argazki erraldoia egingo dute familiek “herriko lagun handi eta zoragarriekin batera”.
Merkatuzar plazatik abiatuta, Foru Plazara egingo dute bidea, eta handik, berriz, Xabier Olaskoagara. Koldo Mitxelena ikastetxeko patioan izango da hurrengo geldiunean, eta Zumardia pasata, Herriko Plazan itxiko dute kalejaia.
Ibilbidean zehar geldialdiak egingo dituzte, eta horietan dantza gidatuak egingo dituzte parte hartzaileek. Horiekin batera, familiek ere euren emanaldiak egingo dituzte. Hori horrela, dantza berezia eskaini nahi duten familia eta kuadrillek posta elektronikora (klik hemen) mezua bidali behar dute, eta azalpen guztiak emango dizkiete.
