Pasaiako Udala, herritarrengandik hurbil
Udal gobernuak herritarrekin komunikatzeko bide berriak ireki ditu agintaldi hasieratik. Bide horretan, agenda digital berria eta Telegram kanala aurkeztu dituzte.
Pasaiako udal gobernuak herritarrekin komunikatzeko bide berriak ireki ditu agintaldi hasieratik. Herritarrengana gerturatzeko helburuarekin, Alkateordetzak berrezartzea eta Komunikazio eta Parte hartze teknikariak kontratatzea izan ziren hartutako lehen neurriak. “Apustu garbia egin genuen hasieratik: udala herritarrengana gerturatzeko eta aldebiko komunikazioa berraktibatzeko mekanismoak martxan jartzea”, esan du Teo Alberro alkateak.
Horrez gain, kultur agenda udalerriko etxebizitza guztietara bidali du udalak, eta barruti guztietan LED pantailak instalatzeko erabakia hartu zen, Laurak Bat elkartearekin elkarlanean. Antxoko eta Trintxerpeko pantailak erabilgarri daude jada, eta San Pedrokoa eta Donibanekoa 2025eko lehen hiruhilekoan jartzea aurreikusi du udal erakundeak.
Herritarrengana gerturatzen jarraitzeko, urrats gehiago egin ditu udalak. Atzo agenda digital berria eta Telegram kanala aurkeztu zituzten Teo Alberrok eta Iraitz Pazos Komunikazioko zinegotziak. “Bistakoa zen bete beharreko hutsune bat zegoela herrian; antolatzen diren egitasmo guztiak multzokatu eta kontsultatu ahal izateko erremintarik ez zegoen. Horregatik, udal eskaintza eta eragileen jardueren programazioa bateratuko dituen atal berezia sortu dugu webguneetan. Atal dinamikoa eta erabilerraza sortzea izan dugu helburu, guztien eskura egongo dena”, adierazi du Pazosek.
Agenda digital hori ikusgai dago jada Pasaiako Udaleko webgunean. Atal horretan Pasaian antolatzen diren ekitaldien inguruko informazio zehatza eta eguneratua aurkituko dute pasaitarrek.
Telegram kanalari dagokionean, helburua da informazio jario eroso eta eskuragarrirako bide berri bat zabaltzea udalaren eta herritarren artean. @PasaiakoUdala kontuan udal albiste eta abisuak jasoko dituzte pasaitarrek. Alberro: “Helburua da bizilagunek herrian gertatzen ari diren jarduera edo azken orduko abisuen berri izatea ahalik eta azkarren; esate baterako, ur mozketak daudenean, trafiko aldaketak edota orotariko emanaldiak”. Udal hautetsiek jakinarazi dute Telegram kanala ireki dutela aplikazioa doakoa eta librea delako eta euskarara egokitua dagoelako.
Herritarren eskura dauden tresna berriez gain, udal ordezkariek gogorarazi dute webgunea eta sare sozialak egunero elikatzen dituztela. Horrez gain, asteko albisteen laburpen bat jaso nahi duenak udaleko buletinera doako harpidetza egin dezake. Ostiralero, albiste eta abisu guztien laburpena jaso daiteke helbide elektroniko bidez. Datozen asteetarako iragarrita dauden ekitaldien berri ere izango dute harpideek.
