'GazteEkinBat!' proiektua gauzatu da Blas de Lezon
Sorginlore Gizarte Elkarteak sustatu du egitasmoa. Ikasleak erretiratuen elkartearekin harremanetan izan dira, eta argazki zaharren erakusketa bat ondu dute. Hilaren 25ean aurkeztuko dute emaitza, 11:30ean.
Argazkia: Ikaslan Gipuzkoa. Sorginlore Gizarte Elkarteak GazteEkinBat! proiektua gauzatu du ikasturte honetan Blas de Lezo LHII zentroko Hasierako Lanbide Heziketako ikasleekin. GazteEkinBat! egitasmoa EkinBat! iniziatibaren barnean dago, eta hainbat erakundek sustatu dute egitasmo hori. EkinBat! proiektuaren helburua da Gipuzkoan bizi diren eta desabantailan dauden gazteen gizarteratzea eta enplegagarritasuna erraztea. Helburu horiek egikaritzeko, gizartean, komunitatean eta kulturan parte hartzea bultzatzen duten testuinguruak sortu eta emantzipazioa errazteko tresnak zabaltzen dituzte.
GazteEkinBat! proiektuan, pedagogia feminista baliatuta, Gipuzkoako Hasierako Lanbide Heziketa publikoko zentroetako gazteen parte hartze soziopolitikoa sustatu eta sinergiak sortzen dituzte tokiko ekosistemen eta zentroen artean. Pasaiako kasuan, erretiratuen elkartearekin harremanetan izan dira, eta hainbat ekintza gauzatu dituzte haiekin. Osatutako diagnostiko komunitarioan auzoko historia nabarmendu da, eta bildu dituzten argazki zaharrekin erakusketa bat ondu dute Blas de Lezoko ikasleek. Erretiratuekin izandako elkarlana eskertzeko eta egindako lana aurkezteko, hilaren 25ean, 11:30ean, Blas de Lezoko sarreran elkartuko dira eragile inplikatu guztiak. Erakusketa aurkezteaz gain, ekintza bat ere prestatu dute. Sarrera irekia da.
