Mozorro festa ate joka da
Inauterietako jai batzordeak ondu duen egitarau zabala aurkeztu du. Musika taldeak izango dira aurtengo inauteriaren protagonistak.
Inauterietako Jai Batzordeak egitaraua aurkeztu du. Ate joka dira Inauteriak. Atzo arratsaldean aurkeztu zuen Inauterietako Jai batzordeak herritar denei begira ondu duen egitarau zabala eta askotarikoa. Kaldereroen eskutik helduko da festa giroa bihar, ostirala, eta martxoaren 4an bukatu da mozorro jaia, sardinaren ehorzketarekin. Tartean, hamaika ekintzez zipriztindutako beste horrenbeste musika talderen agertoki erraldoia izango da Errenteria-Orereta.
Urtero moduan, aurten ere udaletxeko arkupetan photocalla izango da, eta familia jolasek, tailerrek, konpartsen desfileak ez dute huts egingo. Arrakasta handia duen herri bazkaria ere egingo dute, eta horren harira, jai batzordeak azaldu du salmentan jarri eta minutu gutxira bukatu zirela ia denak: “Eskerrik asko, beraz, aurten ere jarduera honi aurten ere egin diozuen harrerarengatik”. Oarsoirriak taldearen familia eta kuadrillen kalejaia eta erraldoi eta buruhandien konpartsa ere ez dira faltako. Aurten Bixkor txarangak lagunduko ditu kaleetan barrena.
Herriko Plazan egingo du eztanda mozorro festak hilaren 27an, ostegunarekin, 19:45ean Asteme, Oilarqueen eta Katuko udaletxeko balkoira irteten direnean. Ondoren Azeri dantza koloretsuaren umoreak hartuko du txanda.
Konpartsek aurkezpena egingo dute Lekuona Fabrikan 20:30ean, eta hiru modu izango dira hura ikusteko. Ikuskizuna presentzialki jarraitzeko aukera izango da Lekuona Fabrikan. Horretarako larunbatean —hilak 22— jarriko dituzte sarrerak salgai euro batean Lekuona Fabrikan, edo online. Bestetik zuzeneko proiekzioa ikusteko beta izango da pantaila erraldoi bidez Niessen Kulturgunean. Horretarako gonbidapena behar da, online eskuratuta edo Lekuona Fabrikako harreran. Azkenik, emanaldia streaming bidez jarraitzeko aukera izango da. Horretarako egin klik hemen.
Egitarau osoa datozen egunetan izango da eskuragarri udal eraikinetan eta turismo bulegoan, eta dagoeneko Herri Biziaren webgunean kontsulta daiteke. Egitaraua kontsultatzeko klikatu hemen.
Inauterietako argazkien bilduma egunero argitaratuko dute Herri Bizia webgunean.
