Irakasleen aldarrikapenak "oztopatzea" egotzi diote Hezkuntzako Lurralde Ordezkaritzari
Itxialdia egiteko baimena eskatu dute irakasleek, baina Hezkuntza Saileko Gipuzkoako Lurralde Ordezkaritzak debekua jarri die. Zenbait irakasleek ordezkaritzaren jarrera salatu dute.
Agerraldia egin zuten atzo arratsaldean zenbait irakaslek hezkuntza ordezkaritzaren debekua salatzeko. Agerraldia egin zuten atzo arratsaldean hezkuntza publikoan diharduten 30 irakaslek Hezkuntza Saileko Gipuzkoako Lurralde Ordezkaritzaren jarrera salatzeko. Errenteria-Oreretako Herriko Plazan bildu ziren, eta azaldu eta gaitzetsi hezkuntza ordezkaritzak ikastetxeetan itxialdiak egiteko jarritako debekua. Ander Tarragona eta Eba Ibañez irakasleek hartu zuten hitza eta adierazi, atzorako itxialdiak antolatuta zituztela Gipuzkoako bost ikastetxetan. Itxialdien bidez, irakasleen lan baldintzak hobetzeko eskatzeko bihar eta etziko—hilak 26 eta 27an— greba deialdiak indartzea zuten helburu: “Itxialdiak legez egiteko, toki erakundeen jabetza diren eskola eraikin publikoak erabiltzeko araubide juridikoari buruzko 77/2008 dekretuak jasotako pausuak jarraitu ditugu, zehatz-mehatz”.
Hala ere, itxialdiak egiteko debekua jaso dutela jarri zuten agerian.
Hezkuntza Saileko Lurralde Ordezkaritzak ezezkoa emateko erabili dituen arrazoietan jarri zuten fokua irakasleek atzoko agerraldi horretan, “eskatutako erabilerak ikastetxeko ohiko eskola jardueran eragin dezakeela aurreikusitako jarduera gauzatzeko ezaugarri egokiak betetzen ez dituelako erantzun digu ezezkoa emateko”. Erantzun horren atzean, irakasleen aldarrikapenak “oztopatu” eta greba deialdiaren aldarria “ezkutatzeko” intentzio betea antzeman dute irakasleek, “aitzakia besterik ez da, itxialdiak egiteko eskaeretan 17:30etik 07:00etara bitarte genituelako eskatuta genituen ikastetxeak, eta itxialdia ordutegi horretan egitea erabaki genuen espresuki eskola jarduera ez oztopatzeko”.
Horren aurrean, “okerreko bidea” hartu izana egotzi diote ordezkaritzari. Ez dela berria jarrera hori jarri zuten, gainera, nabarmen atzoko agerraldian, “urtarrileko greben aurretik Eusko Jaurlaritzak guraso eta irakasleei bidalitako gutunaren bidalketa traketsa ere horren adibide baita”.
Greba deialdia “ezkutatu” eta irakasleen aldarrikapenak “oztopatzetik” urrun, Hezkuntza Saileko Lurralde Ordezkaritzaren debekuak greba deialdia bera indartzeko arrazoiak biderkatu dituen zalantzarik ez dute itxialdiarekin bat egin behar zuten irakasleek, eta horretara deitu zuten, “LAB, Steilas, ELA eta CCOO sindikatuek hilaren 26 eta 27rako deitutako grebetan parte hartzeko deia egiten diegu irakasle guztiei”. Harago jo zuten atzo agerraldira bildutako irakasleek, eta Hezkuntza Sailari hitzarmena berritzeko galdegin zioten, “2010etik iraungita dago hitzarmen hori, eta hura berritzeko beharrezkoak diren edukiak mahai gainean jar ditzala eskatzen diogu. Izan ere, itota gaude lan zamekin edota neurri gabeko lan burukratikoekin. Gu irakasleak gara, eta denbora behar dugu ikasleekin kalitatez egoteko, horrela bakarrik bermatuko baitugu kalitatezko hezkuntza publikoa”.
