Askotariko doinuak, herri anitz batentzat
Azeri Dantza eta Katuko, Asteme eta Oilarqueenen mezuarekin batera hasi dira Inauteriak. Agertoki erraldoi bihurtu da Errenteria-Orereta, askotariko musika melodiekin girotzeko mozorro festa.
Azeri dantzarekin hasi dira Inauteriak. Hasi da mozorro festa. Urtero bezala, hutsik egin gabe Ereintza Dantza Taldeko eta Herri Arte Eskolako Azeri Dantzak eman dio hasiera Inauteriari. Askotariko doinuak entzungo dira kaleetan aurten, Errenteria-Oreretaren aniztasunaren erakusle, izan ere, musika taldeak da aurten herritarrek herria mozorrotzeko aukeratu duten gaia.
Azeri Dantzaren alaitasunak hartu ditu gaur kaleak eta erakustaldi bikaina egin dute beti moduan, dantza jolasean, zirikatzen etengabe, kolore eta algara bizian. Txikienek, dotore hasi dute emanaldia Herriko Plazan eta haien atzetik helduak txistu eta danbolinaren doinuei jarraituz. Ikusleak dozenaka, Herriko Plaza lepo. Dantza emanaldiaren ostean, Katuko, Asteme eta Oilarqueenen pregoia. Abestera eta bertsotara ere animatu dira, eta ez dira batere gaizki aritu gainera. Herritarrak gozatzera deitu dituzte, Inauteriak bizitzera, eta teklarik gabeko eskusoinu zein sokarik gabeko gitarrak jotzera, beti ere, errespetutik eta parekidetasunetik.
Bihar ikastetxeak izango dira protagonistak. Musika taldeen gaiari segika egingo dituzte desfileak herriko kaleetan batzuk, urteroko gaiei leial ariko dira besteak, eta denek ikusle ugari izango dituzte bide bazterrean txaloka. Azeri Dantzarekin hasitako Inauteriak, Sardinaren ehorzketarekin bukatuko dira; hasi eta buka Ereintza elkartearen eskutik, beraz.
Aurretik, bost egun luze, mozorrotu, gozatu, kalera atera eta mimoz eta lan handiz Inauterietako Jai Batzordeak ondutako egitarauaz gozatzeko. Egitarau osoa hemen klik eginda ikus daiteke.
Ondoko bideoa, Imanol Saiz Gomez de Segurak egina da.
