Trapujale eta lezoarrak, pozik
Trapujale iritsi da, eta Piztu Lezori aitortza egin diote. Hasi dira Lezoko inauteriak. Biharko Ostiralorin eta etziko Larunbatgorrin, ekitaldi asko.
Trapujalek ez du hutsik egiten. Duela 37 urtetik Ostegunzuri guztietan jaisten da Lezora. Hala izan da gaur ere bai. Jaizkibelgo Martizkone baserria itxi, eta herrira abiatu da. Jada herrigunean, Tomas Garbizu Musika Eskolako musikariak eta Alde Zaharreko Joaldunak zituen zain, harrera ederra egin diote. Gurutze Santuaren plazaraino eraman dute, herritarrek bide ertz eta espaloietan “kaixo, aspaldiko!” esaten zioten bitartean. Aurretik, arratsaldean, Lezo Herri Eskolan egona zen Lezoko inauterien ikonoa; haurrekin izan ondoren, jada ilunabarrean, herritar ororen agurra jaso du. Plaza piztu du. Zirikuak eta Marinazkane ez dira agertu. Nonbait, ilunpean, zelatan ziren.
Herria pizten ari direnak, ordea, Piztu Lezoko kideak dira. Iaz hamar urte bete zituzten gazteen ikuskeratik Lezo eraldatzen eta aberasten. Trapujale Taldeak zintzo asko omentzen du urtero eragile bat, eta aurten Trapujale Saria duela hamarkada bat sortu zen mugimendu argitsu horrentzako izan da. Une batez Trapujaleri itzala egin diote Piztu Lezokoek gaurko inauterien hasiera ekitaldian. Martizkoneko bizilaguna ez da haserretu. Alderantziz, harro azaldu da. Trapujalek ere nabaritu duelako duela hamar urteko Lezo, eta egungoa, ez direla berberak Piztu Lezori esker: “Hobera egin du herriak. Argitsuagoa da orain. Zerbait piztu dute herrian. Piztu Lezo maite dut”, esan dio pertsonaiak HITZAri, ia isilpean, herritarrak ohar ez zitezen hark ere hitz egiteko gaitasuna duela.
Piztu Lezokoak pozik. Jendaurrean hitz egin dute. Mikel Arruti alkateak eman die hitza. Gozo zegoen plaza bete-bete zelako Lezoren gidari zakuduna gaur. Trapujale Saria berezia dela esan du alkateak, oso Lezokoa delako: “Lezoartasun sentimenduari gorazarre egiten dio Trapujale Sariak. Piztu Lezok ongi merezia du oroigarria. Antolatzen dituzuen ekintzetan ondo pasatzeaz gain, baduzue helburu bat: lezoartasun hori, Lezo zer den, Lezok zer esan nahi duen transmititzea gazte belaunaldiei. Oso ondo egiten duzue hori. Zorionak!”.
Jada Trapujale Saria eskuan, Piztu Lezoko ordezkariek bihotza eskuan hitz egin dute. “Eskerrik asko. Azken hamar urteetan egin dugun lanaren ondorio da sari hau, eta honen zati izan den orori eskaini nahi diogu. Hemen gaude, elkarrekin, pixkanaka piztutako suaren dantzan. Aurrerantzean ere bizi-bizi jarrai dezan desiatzen. Hemendik hamar urtera, nahiko genuke baten batek esatea Lezo euskalduna dela, ez dugula protokolo feministarik behar, asanblada bizi-bizirik dagoela igandero, herrian belaunaldi arteko zaintza esparrua dagoela, lan handia egin ondoren makina bat jende mugitu eta Lezon gaztetxea lortu dela. Honetan aritzeak tripako minak sortzen dizkigunean, edo eragiten ditugunean, gogoan izan: erreko ez balu, ez litzateke su! Segi suak pizten. Zuei esker, suei esker!”. Txalo asko ondoren. Piztu Lezokoak harro. Badute motiborik puztuta izateko. Haien hurrengo asanbleara, Zirikuak ere agertuko al dira? Ez dirudi.
Gaurko Ostegunzuritik, biharko Ostiralorira egingo dute jauzi Lezoko inauteriek. Bihar, goizean, ikastetxeetako ikasleen emanaldiak izango dira; arratsaldez, Zirikuen agerraldia eta Lezoko Dantzazaleen ikuskizunak; ilunabarrean, Traputira Txapelketa, kartelada eta plazako afari autogestionatua (mahaiak, aulkiak eta sagardoa udalaren esku). Beheko zerrendan daude Lezoko inauterien ekitaldi den-denak.
Inauteriak hasi dira. Joan daitezela egoki. Errespetuan, berdintasunean, eta festa giro jatorrean.
Jarraian, gaurko hasiera ekitaldiaren hainbat irudi eta bideoa.
Lezoko inauteriak 2025. Egitaraua.
Hilak 28, Ostiralori
- 09:15. Lezo Herri Eskolako eta Institutuko ikasleen kalejira.
- 10:30. Lezo Herri Eskolako ikasleen ‘Jolasak’ ikuskizuna Bekoerrota kiroldegian.
- 11:15. Pasaia-Lezo Lizeoko ikasleen Trapujale Festa Gurutze Santuaren plazan.
- 17:30. Sorgin dantza eta Zirikuen kalejira Gurutze Santuaren plazatik.
- 18:30. Lezoko Dantzazaleen desfilea herritik zehar.
- 19:30. Lezoko Dantzazaleen eskutik, ‘Sorginen dantzak’ ikuskizuna Gurutze Santuaren plazan.
- 19:30. Gurutze Santuaren plazan, Traputira txapelketa.
- 20:00. Kartelada.
- 21:00. Barrikote autogestionatua Gurutze Santuaren plazan.
Martxoak 1, Larunbatgorri
- 11:30. Murixka Dantza Taldearen kalejira haien lokaletik hasita. Bukaeran, emanaldia Gurutze Santuaren plazan.
- 17:00. Desfile herrikoia San Pedro auzoan hasita. Gaia: ‘Zirkua’.
- 19:00. Karro-poteoa Karlos Saldisen hasita.
- 20:30. Mozorro festaren aurkezpena Gurutze Santuaren plazan.
- 21:00. Mozorro afari herrikoia Koldobike Gezala pilotalekuan.
- 23:30. Elektrokela elektrotxarangaren irteera.
Martxoak 4, Asteartebeltz
- 15:15 Lezo Herri Eskolan, Trapujaleren epaiketa txikia. Ondoren, txokolatada.
- 19:00. Trapujaleren epaiketa Gurutze Santuaren plazan. Jarraian, Herio Bidaia.
