Arrarte errekastoko banbuak kendu dituzte
1.500 metro koadroko eremuan izan da lanean URA Agentzia. Udalak jakinarazi du bertako landareekin ordeztuko dela kendutakoa.
Banbu basotxoa, garbiketa egin aurretik.Pasaiako Udala Pasaiako Udalak jakinarazi du 330 metro kubo banbu kendu dituela Donibanen, zehazki Jaizkibelerako maldaren hasieran dagoen Arrarte errekasto inguruko 1.500 metro koadrotan. Udalak eta URA Agentziak lankidetza protokoloa akordioa dute, eta horren barrukoak izan dira lanak. URAk egin ditu garbitze lanak, hilabete eta erdiz, 35.517 euroko aurrekontuarekin.
Banbua ez da bertakoa. Espezie inbaditzailea da. Eremu zabala zuen hartua landareak Arrarte errekastoaren inguruan. Hala, banbuak mozteaz gain, sustraietan ere lanketa egin da berriro hazi ez daitezen. Kendutako landareak, berriz, udalaren lursail batera eraman dituzte, han lehortu, ondoren birrindu, eta udalak egiten dituen lanetan erabiltzeko. Landarea kentzeko lanak errekastoan ziren hondakinak kentzeko erabili dituztela zehaztu du udalak.
Operazioaren, eta URA Agentziarekin egindako hitzarmenaren gaineko azalpenak eman ditu Iraitz Pazos Ingurumen zinegotziak: “URArekin sinatutako lankidetza-protokoloak bide berria ireki du Pasaiako errekastoak txukundu eta berreskuratzeko. Xede nagusia da gizakiok sortutako kalteak irauli eta espazio naturalak ondo kontserbatu eta berreskuratzea.” Azaldu du datozen asteEtan txukundutako espazioan zuhaixkak ereingo direla, eta erriberako espezieekin landaketa berri bat planifikatu dela. “Lankidetza honi esker, aurrerantzean, gune hori herritarren gozamenerako naturagunea izango da”, esan du.
Zonaldea, garbiketa ondoren.
