Kabaret bat da Donibaneko bizitza
Joan den mendeko hasierara egin du jauzia gaur Donibanek, Belle Epoque-ra. Herri desfile koloretsua egin dute sanjuandarrek.
Kabaret dantzariak, mafiako kideren bat, apaizak, erraketistak, hiri handietako eraikin erraldoiak altxa zituzten langileak eta beste asko batu dira gaur Donibanen. Belle Epoque-era, XX. mendearen hasierara egin dute jauzia gaur sanjuandarrek. Hori guztia irudikatzeko desfilea egin dute, goizez, herritik zehar. Goiz hotza epeldu dute. Eguzkia ondoan, aro eguzkitsu eta ustez zoriontsura joan dira barruti zaharreko kaleak.
Herritarrek osatu dute desfilea. Herri desfilea izan da. Aiton Amonen aterpetik irten, eta Meipi aldera joan dira lehenik. Ondoren, auzotik herriaren erdira, Santiago plazara. Grazia askorekin egin dituzte koreografiak haur, heldu eta adinekoek. Musikaren dezibelioek, akaso lotan zen baten bat aztoratuko zuten. Garai eroak baitziren Belle Epoque-koak. Gozamena, dibertimendua, askatasuna…
Donibanen bezala, San Pedron eta Antxon ere ari dira bizitzen inauteriak gaur; azken bi barruti horietako irudiak aurrerago zabalduko ditu HITZAk. Bien bitartean, jarraian, Donibaneko bizitza kabaret bat dela (gaur behintzat) azaltzen duten irudiak eta bideoa. Beherago, Pasaiako inauterietako gaurko egitarauak ikus daitezke.
2025eko inauteriak Pasaian. Egitarauak.
ANTXO
Martxoak 1, larunbata
- 12:00: Photocall-a Gure Zumardian. Ondoren, karroza lehiaketa.
- 12:30: Txaranga herrian barrena eta desfilea karrozekin.
- 14:00: Bazkari herrikoia, Antxoko gurasoen eskutik.
- 18:00: Karropoteoa.
- 21:00: Mimos tabernan mokadutxoa.
DONIBANE
- 14:30: Bazkari autogestionatua Meipiko karpan.
- 18:00: Desfilea plazatik Meipira.
- 19:00: Mozorro lehiaketa. Ondoren, DJa.
SAN PEDRO
- 13:00-14:00: Mozorroen desfilea txarangarekin. Ibilbidea: Zamatetetik frontoira, Arraunlari kalea, Torreatze, Kale Zaharra, plaza.
- 14:30: Herri bazkaria, herriko plazan edo Proisan, eguraldiaren arabera. Ondoren, Javi DJa bazkariko lekuan.
- 19:00: Arratsalde pasa Begi Haundin.
