Talde lanean trebatzeko ikastaroak Pasaian
Herriko elkarte eta herritar taldeentzako hiru ikastaro prestatu dituzte udalak eta aldundiak. Aurrez eman behar da izena.
Pasaiako Udalak eta Gipuzkoako Foru Aldundiko Gobernu Oneko eta Berrikuntza Politiko-Sozialeko sailak elkarlanean, Pasaiako elkarte nahiz herritar taldeen formaziorako eta talde lanean trebatzeko hiru gaiko ikastaroa antolatu dute. Ikastaro bakoitzak lau orduko iraupena du, bi orduko bi saiotan banatuta. Zabalik da horietan izena emateko epea, hilaren 17ra arte. Aurrez eman behar da izena udalak erraztu duen posta elektroniko helbidearen bitartez).
Ikastaroak egin daitezen, gutxienez 10 pertsonako taldeak osatu beharko dira bakoitzeko. Beraz, udaleko Parte Hartze Sailak gai horietan interesa izan dezaketen elkarte eta taldeetako kideei izena eman dezatela proposatu diete, formazio saioak haien elkartegintza eta herrigintza zereginetarako onuragarriak direlakoan.
Honakoak dira hiru ikastaroak:
- ‘Ekintza komunitarioa sustatzeko gakoak’
- Datak: Hilaren 19an eta apirilaren 2an.
- Ordua: 18:00etatik 20:00etara.
- Non: Antxoko Kultur Etxean.
- Ikastaroaren helburuak: instituzio eta elkarteentzat eguneroko erronka bilakatu da komunitatea sendotzea eta bertan parte hartzea sustatzea. Ikastaroaren helburuak izango dira, besteak beste, proiektu komunitarioak garatzeko gakoak eta estrategiak lantzea eta sakontzea, eragileen gaitasunak hobetzea gobernantzan ahalmena handitzeko, eta zenbait partaidetza mota ezagutzea. Helburu horiek lortzeko, elkarteen ahulgune eta indarguneak identifikatu, parte-hartzea zailtzen duten aldagaiak hauteman eta egun ez dauden ahotsak aintzat hartzeko/entzuteko estrategiak pentsatuko dira, gizarte-kohesioa eta guztion parte-hartzea bermatzeko xedeaz.
- ‘Talde eraginkorrak’
- Datak: Hilaren 26an eta apirilaren 9an.
- Ordua: 18:00etatik 20:00etara.
- Non: Donibaneko Juanba Berasategi aretoan.
- Ikastaroaren helburuak: antolaketa eraginkorrerako eta egunerokoan aplikatzeko tresna erabilgarriei buruzko saio praktikoak. Proiektuen plangintzarako eta jarraipenerako tresnak eskainiko dira eta bereziki bi alderdiri erreparatuko zaie: bilera eraginkorrak eta denboraren kudeaketa. Hori guztia kasu errealetatik abiatuta landuko da, proposamen berri eta aplikagarriak lortuz. Hori lortzeko, plangintza eta jarraipena, proiektuak kudeatzeko tresnak eta denbora-baliabideen kudeaketa bezalako edukiak landuko dira.
- ‘Talde osasuntsuak
- Datak: Maiatzaren 7 eta 14an.
- Ordua: 18:00etatik 20:00etara.
- Non: Antxoko Kultur Etxean.
- Ikastaroaren helburuak: pertsonen ongizatean oinarritutako antolakuntza-eredu osasungarriak ezagutzeko eta horietan bilakatzeko interesa duten elkarteentzako tailerra da hau. Eraginkortasun eredutik talde kulturari eta premia erlazional zein pertsonalei erantzuteko edukiak landuko dira. Horretarako, taldea kohesionatzeko zenbait kasu erreal landuko dira eta gatazkei aurre egin eta kudeatzeak duen garrantziari erreparatuko zaio, komunikazio asertiboa eta kudeaketa emozionala oinarri hartuz.
