Oporrak Bakean programak harrera familiak behar ditu
Egitasmoarekin bat egin nahi duten familiek hil bukaerara arte dute izena emateko aukera. Haur sahararrei bi hilabeteko aterabide bat eskaini nahi die programak.
Urtarrilaren erdialdean 2025eko Oporrak Bakean programa jarri zen martxan, Esperantzari leiho bat lelopean. Kanpaina aurrera doa, eta hurrengo larunbatean, hilaren 22an, festa moduko bat antolatu dute Zumaian, egitasmoa ixten hasteko. 11:00etan jarri dute hitzordua, eta alkate, zinegotzi, kantari edota harrera familiak elkartuko dira Zumaian. Erakusketa bat ere ondu dute. Aurtengo kanpainaren prestaketa azken txanpan badago ere, Itziar Goinentxea Bixi-Bixi elkarteko kideak jakinarazi du hil bukaerara arte dagoela egitasmoan izena emateko aukera.
Goinetxeak aitortu du harrera familiak behar dituztela Oporrak Bakean egitasmora batzeko. Esperantzari leiho bat leloa darabilte aurtengo ekitaldian, eta Bixi-Bixiko kideak adierazi du haur sahararrei esperantza baino ez zaiela gelditzen. Goienetxeak gogorarazi du Sahara gerran dagoen herrialdea dela, eta haurrak bertatik atera behar dituztela. Horrez gain, 50 urte daramatzate basamortuan bizitzen, ezer gabe, eta hango egoera okertzen ari da egunetik egunera. Gero eta gehiago kostatzen ari zaie janaria lortzea, eta gabezia handiak dituzte irakaskuntzan eta osasungintzan. Basamortuan, gainera, udan 55 gradu egiten dituela adierazi du Goienetxeak.
Gauzak horrela, familiei dei egin diete parte hartzera. Haur horiei aterabide bat eskainiko zaie, bi hilabetez, eta basamortutik harago beste mundu bat ezagutzeko aukera izango dute. Haurrak ekaina bukaeran datoz Euskal Herrira, eta abuztu bukaeran hartzen duten berriz ere Sahararako bidea. Hemen egoten diren denboran, elikadura eta osasuna bermatzen zaizkiela baietsi du Goienetxeak, eta gerratik eta basamortutik egiten dute ihes.
Bixi-Bixiko kideak nabarmendu du harrera familiak ez direla inoiz bakarrik egongo, Sahararen aldeko komunitatea bidelagun izango baitute prozesu osoan zehar. “Familiek ez dezatela beldurra izan. Gu hor egongo gara eta ez ditugu inoiz bakarrik utziko”, esan du Goienetxeak.
