Escalerillaseko familiak etxegabetze demandak jasotzen ari direla salatu du Etxebizitza Sindikatuak
Familia horiek pairatzen ari diren egoera salatzeko, prentsaurrekoa egingo du bihar Etxebizitza Sindikatuak Eskalerillasen, 17:30ean.
Euskal Herriko Etxebizitza Sindikatu Sozialistak jakinarazi du Eskalerillaseko familiak etxegabetze demandak jasotzen ari direla. Etxebizitza Sindikatuak adierazi du hilabeteak daramatzala Pasaiako portuko bizilagun horien egoera salatzen. Bizilagun horiek lau hamarkada baino gehiago daramatzate portuaren jabetzako etxebizitza horietan bizitzen, eta beste aukerarik izan gabe, etxegabetze bati aurre egin behar diotela salatu dute. Etxebizitza Sindikatuak gogorarazi du portuak merkantziak garraiatzeko trenbide bat eraiki nahi duela eremu horretan, eta diseinatu duten trazaduraren arabera, zortzi familia bizi diren etxebizitza blokea eraitsiko dutela.
Familia horiek pairatzen ari diren egoera salatzeko, prentsaurrekoa egingo du bihar (hilak 19) Etxebizitza Sindikatuak Eskalerillasen, 17:30ean. Horrez gain, baietsi dute bizilagunen egoera okertuko duen gertaerak eman direla berriki:
- Portuak prozedura judizialak hasi ditu familiak etxetik botatzeko.
- Portuak hiru familiari jakinarazi zien portuaren jabetzako beste etxebizitza batzuetan birkokatzea eskaintzen zitzaiela. Etxebizitza horietan beste familia batzuk bizi dira, eta portuak jakinarazi berri die beren etxeak utzi behar dituztela.
Gedar Langile Kazetak dokumental bat sortu zuen iaz bizilagun horien egoera aurkezteko.
