Oporrak Bakean kanpainako bukaera ekitaldia, larunbatean
Bukaera ekitaldia Zumaian izango da, 11:00etatik aurrera. Besteak beste, Oporrak Bakean kanpainaren balorazioa egingo dute arduradunek.
Larunbat honetan (hilak 22) Oporrak Bakean kanpainaren bukaera ekitaldia egingo da Zumaiako Alondegia kultur etxean, 11:00etatik aurrera. Ekitaldi horretan aurtengo kanpainaren balorazioa egingo da, argazki erakusketa bat jarriko dute, Saharako te eta pastak dastatzeko aukera izango da, eta zuzeneko musika egongo da Esaezin eta Zumarea taldeen eskutik. Bukaera ekitaldian Diasporako gazte sahararrak, Fatma Labiad eta Mohamed Fadel Frente Polisarioko Euskadiko ordezkariak, Diasporako sahararrak, EAEko elkarteetako ordezkariak, harrera familiak eta programa laguntzen duten udalak eta prentsa arduradunak bilduko dira. Udal laguntzaileen artean daude Lezokoa eta Pasaiakoa.
Esperantzari leiho bat lelopean, aurtengo kanpaina azken pausoak ematen ari da, eta larunbatean itxiko dute zikloa. Arduradunak harrera familia bila ari dira, eta interesdunek hil bukaerara arte izango dute egitasmora batzeko aukera, udan, bi hilabetez, haur sahararrak Euskal Herrira ekarri ahal izateko eta haiei aterabide bat emateko.
