'Israelen izaera terrorista' salatu eta Palestinaren askatasuna babestu du EHKSk
Israelek su-etena hautsi eta asteartean 400dik gora palestinar erail izana salatzeko elkarretaratzea antolatu zuen atzo Euskal Herriko Kontseilu Sozialistak Iztietan.
Israelen aste honetako erasoa salatzeko elkarretaratzea antolatu zuen atzo, hilaren 21ean, Euskal Herriko Kontseilu Sozialistak Iztietako Diputazio plazan. Izan ere, Israelek su-etena hautsi eta “astearte goizaldean 400 palestinar baino gehiago erail zituen estatu sionistak Gazan, ospitaleen, etxebizitzen, eta kanpalekuen aurka egindako bonbardaketetan”, Kontseilu Sozialistak salatu duenez.
Gainera, “Gaza iparraldea eta hegoaldea lotzen dituen korridore nagusia okupatu” dutela jakinarazi zuten, baita su-etena izenpetu zenetik hona “ur eta argi hornidurak moztuta edota laguntza humanitarioa blokeatuta” utzi ere. EHKSren iritziz, “Israelen izaera terrorista” eta “koloniala” agerian gelditu da, eta “estatu supremazista honek ez duela akordiorik nahi, eta palestinar herriaren aurkako genozidioarekin aurrera jarraitzeko asmoa duela” deritzote.
Palestinaz gain, Ekialde Hurbileko beste herrialde batzuei ere eraso die Israelek, tartean Siria, Yemen, Libano edota Iran. Erasoaldi honek Israelen interesei erantzuteaz gain, “Estatu Batuak buru duen mendebaldeko bloke inperialistaren interesei erantzuten diela” gaitzetsi zuten.
Europar Batasuna ere erruduntzat jo zuten, bertako herrialdeek “Israelekin harreman diplomatiko, ekonomiko eta militarren izaten jarraitzen” dutelako, nahiz eta batzuek “Palestinaren aldeko mezu hipokritak zabaldu”, besteak beste, Espainiako Gobernuak.
“Sozialdemokraziak defendatzen duen bi estatuen irtenbideari” uko egiten diote, “ezinezkoa” delako eta “estatu sionistaren existentzia zilegiztatzen” baitu. Gainera, su-etena ez zaie egiazko irtenbidea iruditzen, Israelek erakutsi baitu “ez duela inolako akordiorik errespetatuko”.
Kontseilu Sozialistak argi du “Palestinaren askatasuna estatu sionistaren desagerpenaren eskutik baino ezingo dela etorri”. Horretarako, hainbat aldarrikapen aurkeztu zituzten: “palestinarren erresistentzia eskubidea babestea inolako ekidistantziarik gabe”, “mendebaldeko enpresen, instituzioen eta alderdi politikoen konplizitateari aurre egitea Israelekin harremanak eten ditzaten”, eta “nazioartean kapitalismoari eta gerrate inperialistei aurka egingo dien langileon indar iraultzaile bat antolatzen hastea”.
“Basakeria sionistaren” aurrean mobilizatzen jarraitzeko deialdia egin zuten, “Palestinaren alde eta gerra inperialistaren aurka”.
