Kultur-emariak ez du etenik
Oparo, eta zuzenekoez lepo. Hala dator hilabete honetarako eta maiatzerako Errenteriako Udalak ondu duen kultur agenda.
Landa, Pimenta eta Gartzia gaurko agerraldian, lekuona Fabrika sarreran. Oparo, eta zuzenekoez lepo. Hala dator hilabete honetarako eta maiatzerako Errenteriako Udalak ondu duen kultur agenda. Maite Gartzia Kultura zinegotziak, Laura Landa kultura teknikariak eta Ana Pimenta, Vaiven Producciones konpainiaren ordezkariak aurkeztu dute programazioa Lekuona Fabrikan. ez da kasualitatea izan Pimenta gaurko agerraldian izatea; Vaiven konpainiak azken emanaldia egingo baitu asteburu honetan bertan Errenteria-Oreretan, 28 urteko ibilbide luze eta oparoari bukaera emateko.
Programazioa “tentagarria” izango dela azaldu du Gartziak, beti moduan “publiko zabalari begirakoa”. Lekuona Fabrikan zein Niessen Kulturgunean izango dira emanaldiak. Gaurko agerraldian ere jarri du nabarmen Kultura zinegotziak Errenteriako Udalak zuzeneko emanaldien alde egiten duen apustua, eta horrek duen garrantzia.
Lehen hitzordua Vaiven Producciones konpainiaren El patio de las moreras antzezlana izango da. Lehena eta berezia izango dela jarri du nabarmen Landak, “izan ere, konpainiak 28 urteko ibilbidea itxiko baitu emanaldi honekin”. Igandean, hilak 6, izango da emanaldia 19:00etan Niessen Kulturgunean. 28 urteko ibilbide luze horretan 40 ikuskizun sortu ditu konpainiak. Emanaldiaren ostean atarian saioa egingo dute eta bertaratzen direnek aukera izango dute konpainiako kideekin eta Pimentarekin berarekin hitz egiteko, “ez ikuskizunaz soilik, baita Vaivenen ibilbideaz, eta konpainiak egin duen ekarpenaz euskal antzerkiaren ekoizpen arloan”.
Pimentak berak azaldu ditu antzezlanaren gainekoak. “Harro” eta “eskertuta” azaldu da Vaiven konpainiako ordezkaria antzezlana Errenteria-Oreretan eman eta bertan konpainiaren ibilbidea ixteko aukera izateagatik, “ni hemen hasi nintzen antzerkian, Ur konpainiaren hastapenetan, zuzendaria zen Helena Pimentarekin. Niessen aretoa izan zen gure lehen espazioa, han egiten genituen entseguak, antzerki eskola bertan sortu genuen, antzerki programazioa ere bertatik antolatu genuen denbora luzean…emozionalki lotura handia dut, beraz, Niessenen espazio horrekin. Halako une berezian gainera, zirkulua ixtea da, etxera itzultzea bezala”. Hori horrela, esker ona, udalari eta kultura zinegotziari,Pimentak, “Vaiven Producciones konpainiaren agurraren lekukoa hartu izanagatik”.
Igandean Niessen aretoak hartuko duen antzezlana “oso berezia” dela esan du Pimentak. Bere herritik urrun bizi da Isabel, azken urte luzeetan, eta etxera itzuliko da, ama, Amparo, zaintzera gaixotu ostean: “Konpondu gabeko familia arteko kontu ugari, konpontzeko ugari dago familia topaketa horretan, eta horrekin batera, ama zaindu behar dute horrek suposatzen duenarekin familia ekosisteman”. Familiaz hitz egitetik harago doala lana azaldu du, emozioei apelazioa egiten diela, eta ikuslea hasiera-hasieratik identifikatuta sentitzen dela jarri du nabarmen, “zure familia izan daitekeela sentitzen duzu. Edozein lekutan kokatuta izan daitekeen herri txiki batean gertatzen da, berdin du kokapenak, bakailaoa pil-pil erara edo beste edozein janari usain suma daiteke, kontatzen digunarengatik edozein etxetara sartu bagina bezala sentiarazten gaituelako, gure etxean, edo gure familian sartzea da. Zaintza azaltzen da, eta hori, emakumeekin estu lotuta dago”.
Antzezlana bizitzari, memoriari eta batez ere duintasunari gorazarrea dela ere esan du, “dramatik harago, umore eta konplizitate une ugari dituen lana da, xamurtasuna bor-bor”. Horri gehitu dio, berezia izango dela oso, “azken emanaldia dugulako, gure azken haurra izango da, eta antzezlan berezia aurkituko dute ikusleek. Ezin dute galdu”.
Bat egin du Landak Pimentaren hitzekin, eta gaineratu du antzezlana, “bidaia emozionala” dela: “Denok sentituko gara identifikatuta, emozionala oso, baina gozarazten duen erritmo bizia duen lana da”. Konpainiari ere egin dio aipamena teknikariak eta nabarmen jarri Vaiven produkzioak konpainiak “historia” egin duela antzerkigintzan.
Gartziak eskerrak eman dizkio Pimentari, “guretzat garrantzitsua da oso hemen hasi zenuten ibilbidea hemen bukatzea. Asko eskertzen dugu azken emanaldia hemen egitea”.
Azken aipamena Pimentak, Sandra Ferrusi antzezlanaren zuzendari eta egileari, eta antzezleei, “lan bikaina da antzezleena”.
Antzerkia, musika eta dantza
Hilaren 11n Khea Ziater konpainiaren Scrooge mamua familiari begirako antzezlanak hartuko du lekukoa kultur agenda elikatzen jarraitzeko. Niessen kulturgunean izango da, 18:00etan. Eta antzerkitik musikara jauzi eginda, hilaren 12an, energiaz beteriko musika ikuskizuna ondu dute Lekuona Fabrikan. 19:00etatik aurrera, DJ Eromena, Txiltxoko x Peye Rose, Tatta & Denso eta Brava izango dira Lekuonako Sorgunearen oholtza gainean.
Maiatzeko lehen emanaldia antzerkiaren eskutik helduko da 16an, 18:00etan Niessen Kulturgunean. Familiei begira Nire beldurrik maiteenak eskainiko du Producciones Maestras konpainiak. Maiatzern 25ean, berriz Eneko Gilek eta Koldo Arostegik Vulnerable ikuskizuna eramango dute Niessen kulturguneko agertokira. Dantza eta performancea nahasten dituen ikuskizunak maskulinotasuna modu kritikoan hartu du ardatz.
Bi hileko programazioari ginga jartzeko, berriz, Xabier Gutierrez XSakara bermeotarrak eta Mirua talde tolosarrak azken melodiekin beteko dute Lekuona Fabrika maiatzaren 31n, 20:00etatik aurrera.
Sarrerak salgai daude jada (klik hemen), Lekuona Fabrikan eta Aldakoenean. Kontzertuek 10 euro balio dute, helduentzako ikuskizunek 9 euro, eta familia ikuskizunek, berriz, 3,5 euro. Kultura txartelaren titularrek %25eko deskontua izango dute.
