Mende laurdena ospatzeko, irudi berria
Erromeria Egunak 25. ekitaldia izango du aurtengoa. Horren harira, hilabetero ekintza bat antolatzen ari da egunaren antolatzailea den Ereintza Dantza taldea.
Sona ikaragarria hartu du. Horren erakusle, Erromeria Egunera biltzen den jende andana urtero-urtero. Aurtengoa berezia izango da, mende laurdena beteko duelako euskal plaza dantzen erreferente bilakatu den Erromeria Eguna.
Hori horrela, urtean zehar eta uztaila arte, hilero hainbat ekintza antolatzen ari da Erromeria Egunarekin lotuta Ereintza Dantza taldeak. Eurak dira antolatzaileak, eta aurtengoa, beharrik ez badu ere erantzunarengatik, bereziki girotu nahi dute urteurrenaren harira.
Dantza ikastaro irekia antolatu zuten aurreko hilabetean, eta orain berriz, Erromeria Egunarentzat sortu duten logo berria zabaldu du Ereintzak, baita hura sortzeko prozesua biltzen duen bideoa ere.
Hilabete honetan, 11n zehazki, hitzaldia antolatu dute 18:00etan Reina aretoan Mikel Sarriegirekin. Beasaindarra da Sarriegi, dantzaria eta mendi ingeniaria, eta zazpi aldiz irabazi du Euskal Herriko Aurresku txapelketa; lehen aldiz, 19 urterekin. Dantza zuzendari eta koreografo ere aritu da.
Maiatzean berriz, kalejira antolatu dute herriko kaleetan barrena. Maiatzaren 24an izango da, 12:00etan hasita. Ekainaren 21 aukeratu dute abestiaren aurkezpena egiteko. Zumardian izango da, 12:30ean.
Erromeria Eguna berriz, uztailaren 19an egingo dute; ohi bezala egun osoko festa izango da.
Erromeria Egunerako irudi berria sortu du Ereintza Dantza taldeak 25 urteurrenaren harira.
