Negoziaziorik ezean, hezkuntza publikoko irakasleak berriz ere greban
Gaur eta biharko grebara deituta daude hezkuntza publikoko irakasleak. Jarraipen handia izaten ari da Oarsoaldean.
Don Boscoko irakasleak, ikastetxearen sarreran gaur goizean egindako elkarretaratzean.Grebalariek bidalitakoa Gaurko eta biharko grebara deituta daude hezkuntza publikoko irakasleak. Bizkai, Araba eta Gipuzkoa artean 27.000 dira, horietatik asko Oarsoaldeko ikastetxeetan dabiltzanak. Joan den astean Jaurlaritzako Hezkuntza Sailaren eta sindikatuen arteko negoziazioek porrot egin zuten; handik aurrera ere ez dira bildu. Beraz, Steilas, LAB, ELA eta CCOO sindikatuek indarrean mantendu dituzte aste honetarako bi mobilizazio egunak (joan den astean hiru egin zituzten). Eskualdeko zentroen atarietan elkarretaratzeak egiten dira goizean zehar; Gasteizen, Jaurlaritzaren egoitzaren atarian, kanpaldia egiten ari dira irakasleak. Eskualdeko irakasle, zuzendaritrza eta sindikatuek gaurko mobilizazioen irudiak balituzte, lasai asko bidali ditzakete HITZAra posta elektroniko bidez, edo Whatsapp nahiz Telegram bitartez (678 687 125).
Cristobal Gamoneko eta Don Boscoko irakasleek elkarrekin egin dute elkarretaratzea. Argazkia: grebalariek bidalitakoa.
Grebak ez dituzte inolaz ere bertan behera utziko; hala ziurtatu dute Steilasek, LABek, ELAk eta CCOOk ohar batean, Berria egunkarian jasotakoa: “Deitutako grebekin aurrera jarraituko dugu sindikatuok. Pasa den astelehenetik Hezkuntza Sailak ez du proposamen berririk egin, ezta mahai negoziatzailerik deitu ere. Ez die erantzunik eman grebalarion aldarrikapenei, grebak bertan behera uztea beste asmorik ez du agertu”.
Irakasleen egungo lan hitzarmena 2010ekoa da; hots, hamabost urte daramatzate itun berarekin. Langileen ordezkariek ikusten dute zer hobetua: besteak beste, lan zamak arintzeko neurri zehatzak adostea, erretiroa hartzeko baldintzak hobetzea, galdutako erosahalmena berreskuratzea, eta enplegu publikoa bermatu eta lanpostuak egonkortzea. “Lan hitzarmen duina” eskatzen ari dira, finean.
Jarraian, gaurko greba Oarsoaldeko ikastetxeetan izaten ari den eragina, datuetan:
Pasaia
- Karmengo Ama Ikastetxea: %66,67
Lezo
- Lezo Institutua: %80
- Lezo Herri Eskola: %80-82
Oiartzun
- Elizalde Herri Eskola: %80 inguru.
- Elizalde Institutua: %45.
Errenteria-Orereta
- Koldo Mitxelena Institutua: %60 inguru.
- Koldo Mitxelena Ikastetxea: %77.
- Bizarain Ikastola: %62.
- Bizarain Institutua: %59.
- Cristobal Gamon Ikastetxea: %67.
- Don Bosco Lanbide Heziketa Ikastetxea: %45,93.
Gasteizko Jaurlaritzaren egoitzaren atarian kanpaldia egiten ari dira irakasleak. Argazkia: Irakasleok Borrokan
