Errugbi eskolen topaketa Beraunen, igandean
Jardunaldian 8 eta 11 urte arteko haurrek osatutako taldeek zenbait partida jokatuko dituzte haien artean antolatzaileek jakinarazi dutenez.
Errenteria-Oreretan egindako errugbi topaketa batOrereta Rugby Taldea Gipuzkoako Errugbi Federazioak hilabetean behin antolatzen dituen topaketetako bat ekarriko du Errenteriara Orereta Rugby Taldeak igandean. 10:30etatik aurrera jokatuko dituzte partidak, Txingudi, Iruñea, Ordizia, Bera Bera eta Oreretako ehun jokalari inguruk. Beraungo Mikel Odriozola estadioak hartuko ditu partida horiek.
Jardunaldian 8 eta 11 urte arteko haurrek osatutako taldeek zenbait partida jokatuko dituzte haien artean antolatzaileek jakinarazi dutenez. Horrela, bada, egun batez, errugbi zelaia bilakatuko da Beraungoa, eta ikusleei ateak parez pare zabaldu dizkiete. Izan ere, Orereta Rugby taldeak helburu du errugbia Oarsoaldean ikustaraztea, eta interesa izan dezaketen eskualdeko herritarrak kirolera gerturatzea.
Errugbian tradizionala den hirugarren denbora ez da faltako igandeko jardunaldian jokalariei begira. Oraingoan, Lapurdiko Pizzak, Mikel Odriozola estadioko tabernak, eta Ostarte elkarteak babestuko dute hirugarren denbora hori.
Partidez gain, futbol zazpiko zelaian errugbiarekin lehenengo kontaktua egin nahi dutenentzako espazioa onduko dute. Jokoan eta entrenamendu berezia antolatu du Oreretako Rugby taldeak 11:00etatik 12etara. Gainera, tabernan, taldearen jantzi eta materiala erosteko aukera izango da.
Beteranoei deialdia
Errugbiaren astea egingo du Orereta Rugby taldeak ekainean, eta horri begira buru belarri ari da lanean. Astearen barruan, hastapenetako Orereta Rugby Taldearen 40 urteurrena ospatuko dute, baita garaikoak omendu ere orduko jokalariak bazkari batera gonbidatuta. Garai hartako jokalari batzuk talde berritura gerturatu badira ere, garaiko dokumentazioak erakusten duenaren arabera oraindik ere jokalari asko falta direla jarri du nabarmen Xabi Sanchez taldearen koordinatzaileak, “guztiei beraiek egindako esfortzua eta lanak baduela jarraipena erakutsi nahi diegu”. Garai hartako errugbian ohikoa ez zen taldearengana ere iritsi nahi dute, Oarsoaldean sortu zen emakumeen taldearengana: “Errugbi Eskola Independentearen bultzatzaile izan zen Jesus Erroren artxiboan Lezo eta Errenteriako jokalariek osatutako emakume talde baten informazioa aurkitu dugu, baina oraindik ez dugu lortu haiengana iristea. Polita litzateke aitzindari haiekin ere harremanetan jarri eta beraien lana ere balioan jartzea”.
Orereta Rugby Taldeak Eskola Independentearen taldeetan aritu ziren kirolariei ere egin die deia: “Orereta, Beltzak edo Lezoko taldeetako batzuekin harremana badugu, baino Villabonako Herri Ona, Oiartzungo Girizi, Anoeta, edota Azpeitiko Urola taldeetan aritu direnei dei egin nahi diegu”. Horretarako telefono zenbaki bat jarri du eskura Orereta Rugby taldeak, honakoa: 688 69 63 03. Posta elektronikora ere mezua bidal daiteke (klik hemen).
