Ganbera Musikaren XIII. Astea, hilaren 7tik 11ra
Zikloaren XIII. ekitaldiak lau kontzertu jasoko ditu, eta den-denak Trintxerpeko Alkateordetzan izango dira, 19:30ean.
Hilaren 7tik 11ra Pasaiako Ganbera Musikaren XIII. Astea egingo da Trintxerpeko Alkateordetzan. Ganbera Musikaren Astea Pasaia Musikalek eta Juanje Neira Pasaiako Udal Musika eta Dantza Eskolak antolatu dute, Pasaiako Udalarekin, Musikenerekin eta Illunbe Musika Elkartearekin elkarlanean. Aurtengo zikloak musikarekiko eta musika hezkuntzarekiko grina islatu nahi duela adierazi dute antolatzaileek.
XIII. ekitaldiak lau kontzertu jasoko ditu, eta den-denak Trintxerpeko Alkateordetzan izango dira, 19:30ean. Sustatzaileek baietsi dute “kalitate handiko” interpreteez gozatzeko aukera izango dutela Trintxerpeko aretora bertaratzen direnek, Musikenen prestatzen ari diren talentu gazteek interpretatuta. “Interpretazio handiez gozatzeko aukera ez ezik, gure ingurunean garapen musikalari laguntzen jarraitzeko aukera ere bada”, gehitu dute antolatzaileek.
Aitor Brion Kultura eta Ondareko zinegotziak honakoa adierazi du Ganbera Musikaren Astearen inguruan: “Ganbera musika fundazioaren funtsezko elementua da, eta, beraz, baita gure eskolaren prestakuntzan ere. Kontzertu horiek inspirazio iturri dira ikasleentzat, eta etorkizuneko musikari profesionalen hazkundeari laguntzen diote”. Horrez gain, Pasaiak musika hezkuntzarekin duen konpromisoa berretsi du Brionek: “Musikari ona izateko, ezinbestekoa da prestakuntza sendoa izatea. Horregatik, ziklo hauen antolatzaileok egiten dugun lana ez da kontzertuak antolatzera mugatzen, baizik eta belaunaldi berriak motibatzera eta laguntzera ere bai, etorkizunean agertoki horietara igo daitezen”.
Zikloaren bultzatzaile nagusietako bat den Juanje Neira pozik agertu da Pasaiako Musika Eskolak 2024ko azarotik bere izena daramalako eta aurtengo ekitaldiaren aurkezpenean parte hartzeko aukera eman diotelako: “Musikari handi bihurtzeko, prestakuntza akademikoa funtsezkoa da. Ganbera musikaren ziklo hau aukera paregabea da ikasleek kalitatezko erreferenteak izan ditzaten”.
Horrez gain, Neirak zikloaren bilakaeran jarri du arreta, eta osatutako bide oparo horretan jarraitu nahi dute: “Ganbera musika genero oso zabala eta askotarikoa da; gure helburua da entzuleak edizio bakoitzean harritzea eta estilo desberdinak konbinatzea”. Halaber, Neirak programazioaren atzean dagoen prestaketa lan handia mahai gaineratu nahi izan du, askotariko proposamen erakargarriak eskaintzeko helburua duena.
Brionek eta Neirak pasaitar guztiak XIII. ekitaldiko kontzertuetara gonbidatu dituzte. Sarrerak doakoak dira, Trintxerpeko aretoko edukiera bete arte.
Hilak 7, astelehena: Euforia hirukotea
- Biolina: Maria Hernandez.
- Biola: Miguel Medina.
- Pianoa: Carla Delgado.
Hilak 8, asteartea: Kantu eguna
- Sopranoak: Ainhoa Izagirre, Senda de la Montaña eta Pilar Sanchez.
- Baxua eta baritonoa: Hodei Yañez.
- Piano jotzaileak: Joseba Korta eta Alejandro Espinosa.
Hilak 9, asteazkena: Jazz Voodoo Preacher
- Gitarra: Jose Atienza.
- Pianoa: Donny Lopez.
- Baxua: Joao Fontenla.
- Bateria: David Antunez.
Hilak 10, osteguna: Arlequino hirukotea
- Biolina: Cristina Martinez.
- Klarinetea: Luna Orts.
- Bateria: Daniel Garcia.
Hilak 11, ostirala: Euterpe boskotea
- Tronpa: Ariadna Redondo.
- Fagota: Iñaki Elizondo.
- Oboea: Nieves Lopez.
- Klarinetea: Luna Orts.
- Flauta: Luna Poveda.
