Hospitalilloko aparkalekua asfaltatu dute
Jarduketa horien baitan, aparkatzeko 15 plaza berri sortu dira eremu horretan, eta biribilgune bat ere margotu da, trafikoa erregulatzeko.
Martxoaren 28an hasitako asfaltatze eta margoketa lanak bukatu ondoren, Hospitalilloko aparkalekua erabilgarri dago jada. Portuaren adostasunarekin, Hospitalilloko aparkalekuen berrantolatzea egin ahal izan du Pasaiako Udalak, eta 15 aparkaleku plaza berri sortu dira gune horretan. Horrez gain, jarduketa horien barruan biribilgune bat margotu da, trafikoa hobeto erregulatzeko.
Udalak gogorarazi du Adinberriko obrengatik aparkatzeko eremu asko kendu zituztela Trintxerpen. Egoera horren aurrean, udalak hainbat ahalegin egin ditu aparkatzeko eremu berriak gaitu eta egoera horri erantzun ahal izateko. Egoera horren osagarri gisa, Zirizaren atzealdeko eremuan 198 plaza gaitu zituzten, beste 66 margotu ziren Hospitalillon (orotara 91 sortuz) eta beste 17 toki sortu ziren Araneder kalean.
Iraitz Pazos Obra, Zerbitzu eta Mantentze lanen zinegotziak eta Trintxerpeko alkateordeak adierazi du Hospitalilloko jarduketen helburua izan dela “egoera arintze horretan aurrerapauso bat ematea”, 45 leku zeuden eremuan 60 plaza sortzeko antolaketa proposatuz. “Horrez gain, bertatik dabiltzan oinezkoen eta ibilgailuen segurtasuna ere bermatuko da berrantolaketa honekin”, nabarmendu du Pazosek. Berrantolaketarekin, aparkatzeko 106 toki daude Hospitalilloko eremuan.
Halaber, honakoa adierazi du Teo Alberro alkateak: “Gogora ekarri behar da aparkaleku hori Adinberriko obra hasieran zabaltzea lortu genuela gure insistentziari esker. Lanean jarraituko dugu aparkaleku gabeziari soluzio berriak bilatzeko, eta horretarako funtsezko tresna izango da onartu berri dugun Aparkalekuen Ordenantza”.
