Kultur ekitaldietarako sarrerak, era ezberdinean
Lezoko Udalak kultur ekitaldietako sarreren Interneteko ataria aldatu du. Era ezberdinean, baina errazago eskura daitezke orain tiketak.
Era ezberdinean, baina ia-ia berdin. Lezoko Udalak azaldu du herrian egiten diren kultur ekitaldietako sarrerak aurrez Internet bidez eskuratzeko plataforman aldaketak izan direla. Erabiltzaileak ez daitezela larritu: euskarri informatikoa aldatu den arren, webgunea berbera da, beraz, tiketak lortzeko prozedura ere oso antzekoa izango da.
Aldaketa bat bada, ordea. Sarrerak erosteko ohitura zutenek kontua zuten sortua. Hori mantendu egingo da, eta sarbiderako posta elektronikoa ere berbera izanen da. Pasahitza, berriz, berritu beharko dute erabiltzaileek, webgunearen aldaketaz enpresa berri bat arduratu delako, eta horrek segurtasun neurriak bermatzea eta berrestea eskatzen du. “Pasahitza aldatze prozedura erraz eta intuitiboa da”, lasaitu ditu herritarrak udalak.
Aldaketa aurretik eskuratutako txartelak nahiz Gezala Lagun bonuak berdin-berdin erabili ahal izango dira. Dena dela, lezoarrek zalantzak badituzte, badute nora jo: Kultura Sailera dei daiteke (943 51 34 76), edo haiei posta elektroniko bidez idatzi.
