Auzolanak eraldatzeko gaitasuna duelako, elkarlanerako deialdia Antxon
Pasaia-Lezo Lizeoko guraso talde batek uste du Antxoko egoitzaren pareko jolastokia ez dela egoera onean. Inoren zain egon gabe, horretan eragiteko hautua egin dute auzolanaren bitartez. Larunbatean izango da.
Antxoko Lizeoaren egoitzaren eta ondoko eremuaren artxiboko irudia Pasaia-Lezo Lizeoko ikasleen guraso talde batek auzolanerako deia egin du larunbaterako (hilaren 5erako). Uste dute Antxon ikastolak duen egoitzaren atariko jolastokia ez dela egoera egokian, eta horren mantenurako ardura dutenen zain izan gabe, “jolastokiak haurren erabilerarako aproposa izan behar duela” aldarrikatzeko elkarlanera deitu dituzte hezkuntza komunitateko geruza guztietan daudenak. “Badakigu jolastokiaren arazoa ez dela auzolan honekin erabat konponduko, baina konponbidearen bidean abiapuntu polita izan daiteke, eta aurrerapausoak ematen hasi nahi dugu”, esan dute Lizeotik. Jolastokia erabilera librekoa da, herriari zabalik da, eta ikastolak eskola orduetan erabiltzen du gehienbat.
10:00etan ekingo diote auzolanari. Bertako kirol pisten margoketari ekingo diote hasteko. 11:00etan, DBHko Euskara Taldeko ikasleen laguntzarekin haurrentzako jolasak izango dira. 12:00etan egindako ahaleginari aurre egiteko txokolatea banatuko dute, eta ondoren, auzolanean izan direnen talde argazkia aterako dute. Usoz aldekoak eginda, Gure Zumardira joango dira kalejiran. “Gure esku dagoen horretan jolastokia duinago egiten hasiko gara”, zehaztu dute.
Larunbatean eguraldi txarra egingo balu auzolana bertan behera geldituko litzatekeela iragarri du hezkuntza zentroak, beste egunen batera atzeratzeko.
