Bidasoa Goia eremuko hirigintza araudiaz arituko dira Trintxerpen
Pasaiako Udalak bilera ireki bat egingo du hilaren 9an Bidasoa Goia eremuko hirigintza araudiaren aldaketaz hitz egiteko. Bilkura Trintxerpeko Ulia Kultura aretoan izango da, 19:00etan.
Pasaiako Udalak bilera ireki bat egingo du datorren asteazkenean (hilak 9) Bidasoa Goia eremuko hirigintza araudiaren aldaketaz hitz egiteko. Bilkura Trintxerpeko Ulia Kultura aretoan izango da, 19:00etan, eta Bidasoa Goia eremuari dagokion Arau Subsidiarioen (AS) aldaketa puntualari buruzko informazioa eman eta herritarren iritziak eta ekarpenak jasoko dira. Araudi aldaketaren helburua da eremu horretan bizitoki gehiago sortu ahal izatea.
Arau Subsidiarioen aldaketa etxebizitza beharrizan berriei egokitzeko egin dela adierazi du Teo Alberro alkateak: “2012an, krisi ekonomikoaren ondorioz, Bidasoa Goia eremuaren garapena eten egin zen, eta ondorioz, bukatu gabeko urbanizazio bat gelditu zen. Azken urteotan, etxebizitza eskaerak eta beharrak aldatu egin dira, eta Pasaiako Udalak eremu horretan aurreikusitako etxebizitza tipologia berrikustea erabaki du. Helburua da eremu berean etxebizitza gehiago eraiki ahal izatea, bizitoki aukera zabalagoa eskaintzeko”.
Arautegi aldaketarekin, aurretik bi etxebizitzako eraikin atxikiak aurreikusten ziren lekuan, lau etxebizitzako eraikinak eraikiko direla baietsi du alkateak: “Horrela, pisu eta metro koadro kopurua mantenduta, 27 etxebizitza aurreikusita zeuden lekuan 38 eraiki ahal izango dira. Gainera, proiektuan eskola ekipamenduak, parke bat eta oinezkoentzako ibilbide bat ere aurreikusten dira, baita aparkalekuak ere”. Aldaketak etxebizitzen kopuruari soilik eragingo diola zehaztu du Alberrok, gainerako azpiegiturak bere horretan mantenduko baitira.
Asteazkeneko bileraren helburua da Trintxerpeko herritarrek aldaketaren berri izatea eta beren ekarpenak jasotzea. Udaleko ordezkari eta teknikoek aldaketaren xehetasunak azalduko dituzte, eta herritarrek galderak egiteko aukera izango dute. Ondoren, ekarpenak eta hausnarketak jasotzeko gogoeta egingo da.
Bilerara bertaratu ezin direnek aukera izango dute landutako informazioa udal webgunean eskuratzeko. Horrez gain, bilera egin eta ondorengo zazpi egunetan, inkesta labur baten bidez herritarrek beren ekarpenak helarazi ahal izango dituzte.
