Kepa Garbizu hil da
2003-2007 agintaldian Lezoko alkate izan zen Garbizu, baita 2015etik 2016era ere. Euskaltzale eta abertzale emankorra izan zen.
Kepa Garbizu Kepa Garbizu Azkue (Lezo, 1950-2025) hil da. Pello Garbizu bezala ere ezaguna Lezon, herriko alkate izan zen EAJrekin 2003-2007 agintaldian, eta 2015etik 2016ra. Euskaltzale aritua eta abertzale emankorra izan zen.
1960ko hamarkadan, gazte kozkor zela, euskarazko testuak egiten hasi zen Zeruko argia aldizkarirako. Gainera, gau eskoletan irakasle izan zen herriko helduei euskara irakasten eta horiek euskal kulturara hurbiltzen. Besteak beste, Oskarbi taldeko abeslari ere izan zen.
Ezker abertzalearen lehen zatiketan Euskadiko Ezkerrako (EE) militante izatera pasa zen. Alderdi hura PSEra hurbildu zenean, EAJrako jauzia egin zuen. EAJ-EA koalizioaren zerrendaburu zela irabazi zituen 2003ko udal hauteskundeak (ezker abertzalearen hautagaitza legez kanpo utzi zuten), eta lau urtez alkate izan zen.
2015ekoak ere irabazi zituen, baina urtebete ere aginte karguan egin gabe, dimisioa eman zuen: orduko hartan EH Bildurekin akordioa egin zuen herriko EAJk hondakinak kudeatzeko sistema mistoaren alde, baina Gipuzkoako EAJk itun hori begi onez ikusi ez, eta mahaiaren gainean utzi zuen kargua izan zituen presioen ondorioz. Haren ordez Jesus Mari Martiarenak hartu zuen alkate ardura. 1979tik izan zen udalean hautetsi, 2016ra arte.
Alkate izandakoaren omenez hiru egunez udaletxeko ikurrina hiru egunez masta erdira eta xingola beltzarekin izango dela adierazi du Lezoko Udalak. Mikel Arruti alkateak hitz goxoak izan diru Garbizurentzat, eta haren “jarrera irekia” eta “gertuko harremana” goretsi ditu: “Bere azken legealdian berarekin lan egitea egokitu zitzaidan, eta iritzi ezberdinak izan arren, harreman pertsonal irekia eta gertukoa izan nuen harekin”.
