Gazak etorbidea du Errenteria-Oreretan
Orereta-Palestinarekin Herri dinamikak izendatu du etorbide hori Errenteria-Orereta eta Oiartzun arteko bidegorrian, Gazak bizi duen egoera ikusarazi, elkartasuna adierazi eta genozidioa bukatzea eskatzeko.
Palestinako bandera, Gaza etorbidea izendatu duten eremuan. Gazak bizi duen egoera ikusarazi eta Israelek palestinarren aurka indarrean duen genozidioa bertan behera uztea eskatzeko iniziatiba berria egin du Orereta Palestinarekin herri dinamikak. Horri esker, aurrerantzean etorbide propioa izango du Gazak udalerrian, zehazki, Errenteria-Orereta eta Oiartzun arteko bidegorrian. Palestinako bandera handia irudikatu dute bertan, baita Israelek Palestinaren aurka indarrean duen genozidioa zenbakitan bistarazten duten hainbat informazio txartel eseki ere.
Palestinari elkartasun keinua da, Israel bera, hura babesten dutenak eta Palestinaren kontrako genozidioaren aurrean bestaldera begiratzen ari direnak lotsagorritzeko enegarren saiakera ere. Oiartzun ibaiaren bi aldeen artean Palestinako bandera ere jarri dute, zintzilik, eta harekin batera, Libano, Yemen, eta Irangoa; baita ikurrina ere. Balio beza Gaza etorbideak, bestaldera begira ari direnen edota gertatzen dena urrun sentitzen dutenen kontzientziak, eta bihotzak, astintzeko.
Ondoko bideoa Orereta Palestinarekin Herri dinamikak zabaldu du.
