Tentsioa igoko du Zintzilik Irratiak
Irrati librearen 40. urteurrenaren harirako erakusketa zabalduko dute hilaren 29an Xenpelar Etxean.
Lau hamarkada bete ditu Zintzilik Irratiak aske uhinetan. 40. urteurrenaren harira hainbat jarduera antolatzen ari dira. Horien arteko inflexio puntua aurki izango da. Izan ere, hilaren 29tik maiatzaren 10era arte 40 urtez tentsioa igotzen erakusketa zabalduko dute irratikideek Xenpelar Etxean.
Erakusketaren inaugurazioa hilaren 29ko 18:30ean egingo dute. Sorpresak iragarri dituzte. Hortik aurrera, astelehen-larunbat tartean izango da irekita mostra, 17:00etatik 20:00etara beti. Ekintza osagarri bezala, 27 urte ez dira ezer! dokumentalaren proiekzioa egingo dute Xenpelarren bertan maiatzaren 3ko (larunbata) 11:30ean.
FMko 100 frekuentzian entzun daiteke, baita online ere, irratia.
