III. Trapaia Eguna ospatuko da bihar San Pedron
San Pedroko Trapaiak taldearen III. urteurrena goratzeko jaia antolatu du biharko. Sanpedrotarrak 12:30ean jarriko dira martxan, frontoian. Bertan sagardoa dastatu eta bote eta igel txapelketak jokatuko dituzte.
San Pedroko Trapaia taldeak III. Trapaia Eguna ospatuko du bihar (larunbata). Trapaia lagun talde baten ekimenez 2023ko martxoan sortutako talde bat da. Amaia Muguruza da sustatzaileetako bat, eta azaldu du Trapaia herria aktibatzeko eta gai ezberdinen inguruko kontzientzia politikoa garatzeko xedearekin jarri zela martxan: “Ikusten genuen aisialdi eredu berri edo ekintza ezberdinak eskaintzeko beharra zegoela. Herriak plangintzatxo bat behar zuela argi genuen”. Trapaiak, besteak beste, antikapitalismoa, kontzientzia ekologikoa, feminismoa, euskara, euskal kultura edota internazionalismoa bultzatzen dituela jakinarazi du Muguruzak.
Aisialdiari helduz, bihar III. Trapaia Eguna ospatuko dute, eta egun osoko egitaraua ondu dute sustatzaileek. 12:30ean inguruko baserrietako sagardogile txikien sagardoa dastatuko dute frontoian. Aldi berean, herriko erretiratuek bote eta igel txapelketak antolatu dituzte. Muguruzak adierazi du herriarekin lan egiteko asmoa dutela, horregatik ondu dute lehiaketa hori erretiratuek. Frontoitik Antxetara joko dute, eta sagardoarekin batera pintxoak dastatzeko aukera izango dute bertaratzen direnek. Sabelak bete ondoren, kafea hartzeko txanda izango da, 17:00etan. Azkenik, 18:00etatik aurrera, Paketes Bomba taldeak eta DJ Txorimalok San Pedro musikaz blaituko dute.
Orain artean Trapaiak osatutako ibilbidea “gorabeheratsua” izan dela aitortu du Muguruzak. Hala ere, egin dituzten jarduera guztien balorazioa “oso positiboa” izan da taldearentzat, eta aurrera egiteko gogoz daude. Bukatzeko, Muguruzak baietsi du taldea irekia dela, eta edonor batu daitekeela haiekin batera lan egitera. Azkenik, jendea animatu du bihar haiekin batera festaz gozatzera.
