Gaztañoko topoaren pasabidea kenduko du ETSk
Horren ordez, pasabide goratua egingo dute, zubi antzekoa. Egitasmoa idazteko esleipena egin du ETSk, 348.500 eurokoa.
Gaztañoko pasabidea.Izaro Perez Loperena Eusko Jaurlaritzako Mugikortasun Jasangarrian Sailak, Eusko Trenbide Sarearen (ETS) bitartez iragarri du Gaztañoko oinezkoen eta autoen pasabidea kenduko duela. Donostia-Hendaia arteko bidean bakarra da. Hala, proiektua idazteko esleipena jada egina duela esan du ETSk, 348.500 euroko kostuarekin; hori egiteko ardura duen enpresak hamar hilabeteko epea izango du idazketarako. Lanak noiz hasiko diren ez du zehaztu. “Plana udalerriko segurtasuna hobetzeko premiatik dator, etorkizunean trenen maiztasunak handitzea aurreikusten baita”, esan du ETSk. Trenen kopurua handitzeak bidaiarien hazkundea ekarriko duela nabarmendu du, eta beraz, instalazio irisgarriagoak behar dituela herriko topoaren geltoki nagusiak.
Pasabidea herriaren erdigunearen eta auzoaren arteko lotura naturala da auzotarrentzat, oinezkoentzat batez ere. Autoek, egun, auzotik irteteko bakarrik erabiltzen dute trenbide gaineko pasabidea.
Oinezkoentzako pasagune garaia egingo dute, zubi antzeko bat. Zubiaren plataformara iristeko igogailuak nahiz eskailerak jarriko dituzte. Gainera, nasak “birkonfiguratu” egingo direla adierazi du ETSk, eta geltokiaren eraikina berrituko dela ere zehaztu du zabaldu duen oharrean. Bertan jasota dago ibilgailuek egun aukera dutela Pablo Iglesias etorbidearen gainaldean dagoen biribilgunetik sartzeko auzora, baina irteteko alternatibarik ez da zehaztu; litekeena da egitasmoaren idazketan kontuan hartu behar izatea ibilgailuak auzotik nondik irten behar diren.
