Emakume gasteiztarraren hilketa salatzeko elkarretaratzea, bihar
19:00etan izango da elkarretaratzea, Clara Rangel plazan. Udalak hilketa salatzeko erakunde adierazpena egin du.
Otsailaren 8ko elkarretaratzean irudia, Irunen izan zen hilketa matxista salatzeko. Oreretako Asanblada Feministak ere salatuko du apirilaren 25ean gizon batek Gasteizko emakume bat hil zuela Haron (Errioxa, Espainia). Gaitzespen mobilizazioa bihar (hilak 13, asteartea) izango da, 19:00etan hasita Clara Rangel plazan. Mugimenduak han batzera deitu ditu herritarrak.
Hilketa arbuiatzeko erakunde adierazpena adostu du Errenteriako Udalak, “erabat gaitzesten du udal honek erailketa matxista, eta zero tolerantzia adierazi nahi dugu eraso matxista guztien aurrean”; biharko mobilizazioarekin bat egitera deitu ditu errenteriarrak. Gainera, hildako emakumearen familia eta hurbilekoei “elkartasunik beroena” adierazi diete.
“Horrelako gertaerak ez ditugu gure jendartean onartzen eta erakunde gisara lanean jarraituko dugu emakumeok indarkeria matxistarik gabe bizi gaitezen”, esan du udalak: “Halaber, Errenteriako Udalak herritarrak gonbidatzen ditu, eta bereziki gizonezkoak, beren jokabide eta jarrerei arretaz erreparatzera eta edonolako erasoren aurrean jarrera aktiboz jokatzera”.
