Mugak Gaindituz aurkeztuko dute ostegunean
Arkaitz 'Kalu' Erizek Mugak Gaindituz erronka gauzatuko du hilaren 24an, Aspanogi elkartearen alde. Zuzen Gastropub-en aurkeztuko dute egitasmoa.
Erize, iazko '15 urte amesten' erronkaren bukaeran. Maiatzaren 24an beste erokeri bat egingo du Arkaitz Kalu Erize lezoarrak. Baiona eta Lezo arteko bidea egingo du lasterka eta igerian, mendiz, errepidez eta itsasoz. 24ko goizaldean hasiko du bidea Lapurdiko hiriburuan, eta gutxi gorabehera 12 orduko bidea egin ondoren 17:00ak aldera iritsiko da Lezora. Asmo irmoa du erronka berri horrek: Aspanogi Gipuzkoako Haur Minbizidunen Familien Elkartea laguntzea. Erronka horren aurkezpena ostegun honetan (hilaren 15ean) egingo da Errenteria-Oreretako Zuzen Gastropub tabernan, 19:00etan. Bertan Erizek egin nahi duenaren azalpenak emango ditu, eta Aspanogiko kideek euren zereginaren berri emango dute. Pintxo-potea ere izanen da.
Markelen Irriak, Juneren Hegoak eta Trikaia Kirol Elkartearen, eta Lezoko Udalaren babesarekin egingo du Erizek hilaren 24ko erronka. Dozenaka laguntzaile ere izango ditu, egunerako (aurrerago emango ditu egitarauaren xehetasunak HITZAk, arratsaldez izango dira ekitaldi gehienak) hainbat jarduera antolatu direlako Lezon.
Mendiz, errepidez eta itsasoz egingo du Baiona eta Lezo arteko bidea erronkazale lezoarrak. Beti bezala, harekin batera elkartasun keinua egin nahi duenak ateak zabalik ditu. Osteguneko hitzaldian emango dituzte xehetasun gehiago.
