Lezoraino iritsiko da 30. Hatortxu Rock
Hatortxu Rock-en 30. eta azken ekitaldia uztailaren 24tik 27ra egingo dute Lakuntzan. Lezon asteazkenean aurkeztuko dute jaialdia.
Hatortxu Rock-en milaka lagun espero dituzte.Hatortxu Rock Uztailaren 24tik 27ra izango da 30. Hatortxu Rock musika jaialdia Lakuntzan (Nafarroa). Azkena izango da. Antolatzaileek erabaki dute hiru hamarkadako bidean ezarritako helburuak bete dituztela, “belaunaldi berriak nota berriak jo ditzaten”. Azkena izanik, sekulako kartela osatu dute, Euskal Herrian erreferente diren musika talde oso esanguratsuekin. Auzolana da jaialdiaren mamia antolaketari dagokionez, eta bide horretan, boluntarioen ekarpena ezinbestekoa da. Hala, herriz herri ari dira jaialdiaren aurkezpenak egiten, eta aldi berean, auzolanean aritu nahi dutenen bila. Lezon ere hala egingo dute: hilaren 14an (asteazkenean) egingo dute herriko aurkezpena, 19:00etan Ibaiondon.
Uztailaren 24tik 27ra artekoa Hatortxu Rock handiena izango da. Horregatik, 7.000 boluntarioren laguntza behar dute dena egoki joan dadin. Biharko solasaldian horren guztiaren berri emango dute. Dena dela, txandak egi nahi dituztenentzat galdetegia prest dute antolatzaileek euren webgunean. Baliatu esteka hau izena emateko.
“Ez dugu izaterik aske haiek gabe dio kantu ezagunak. Errepresaliatu politikorik gabeko Euskal Herria amesten dugunon jaialdia da Hatortxu Rock”, esan dute antolatzaileek.
