Lezoko Udalak inkestak egingo dizkie herritarrei
Hilaren 14an hasiko dira telefono bidezko deiak egiten, herritarrek eta eragileek dituzten beharrak eta kezkak jasotzeko.
Lezoko Udalak herritarren iritzia jakin nahi du. Zehazki, herriaren egoerari eta udalaren kudeaketari buruzkoa. Bestelako ekarpen eta iritziak ere bere egiteko prest da udal erakundea. Horretarako, telefono bidezko inkesta aroa hasiko du udalak hilaren 14tik (asteazkenetik) hasita. Aztiker Ikergunearen laguntza izango du herritarren etxeak inkestak egikaritzeko, eta deia jasoko duten lezoarrek 10 bat minutuko elkarrizketa izango dutela zehaztu du udalak.
“Lezoko udal gobernuak herritarren kezkak, zalantzak eta desioak entzun nahi ditu, etorkizuneko erabakietan kontuan hartzeko. Herriaren egoera, azpiegituren eta baliabideen kudeaketa, hurrengo urteetako proiektuak eta bestelako gaien inguruan duten iritzia jasotzeko helburua du, etorkizuneko erabakiak hartzerakoan eragile eta norbanakoen kezkak edo ekarpenak kontuan hartzeko”, azaldu du udalak.
Hala, elkarrizketa horietan jasotako informazioa “oso baliagarria” izango dela ziurtatu du udal erakundeak, “zuzenean herritarrek eta eragileek dituzten beharrak eta kezkak jasoko baititugu”. Beraz, deia jasotzekotan, parte hartzera deitu dituzte herritarrak.
