Trintxerpe-Illunbeko beteranoak, maila onean
Gizonen kategorian seigarren izan zen urdinen trainerua. Emakumeen ontziak urratsak egiten jarraitzen du.
Emakumeen traineruko kideak. Igandean, hilaren 11n, izan zen jokoan Zipr-18/70 traineruen beteranoen ligaren laugarren jardunaldia Sestaon (Bizkaia). Han izan ziren Trintxerpe-Illunberen A (gizonena) eta B (emakumeena) Azkuene traineruak.
Gizonen kasuan, denboretan bosgarren izan ziren, baina traineruetako eskifaien batez besteko adinaren arabera ezartzen den handicap-a ezarrita, seigarren gelditu ziren G1 multzoko sailkapenean. Lau jardunaldiren ondoren, laugarren dira sailkapen nagusian trintxerpetarrak.
Emakumeen trainerua, berriz, G2 multzokoekin izan zen lehian, eta hasiberriak direnez kide gehienak, euren zeregina eskarmentua hartzen segitzea da, arraunean urratsak egiten jarraitzea, alegia.
Zipr-18/70 traineruen beteranoen ligak hamabi estropada puntuagarri ditu, eta lau jada egin dituzte. Hurrengoa hilaren 17an (larunbatean) izango da Santurtzin. Trintxerpe-Illunbek antolatuko duena ekainaren 21ean izango da Pasaiako badian, Illunbeko Beteranoen I. Estropada.
Jarraian, bi traineru urdinak Sestaon lehian.
