Bi larrialdi simulakro egingo dira bihar Pasaiako portuan
Pasaiako Portu Agintaritzak bi simulakro egingo ditu bere Autobabeserako Plana eta Itsasoko Barne Plana indartzeko. 10:30ean eta 15:00etan izango dira.
Pasaiako Portu Agintaritzak (PPA) bi larrialdi simulakro egingo ditu bihar (osteguna) bere Autobabeserako Plana eta Itsasoko Barne Plana indartzeko.
Lehen simulazioa 10:30ean izango da, Lezo 2ko kaian, eta ontziratu gabeko ferrosilizioaren zamalanetan saka bat erorita gertatutako istripu baten simulazioa egingo da. Bertan, panpinen edo boluntarioen bidez irudikatuko diren eta patologia ezberdinak izango dituzten bost pertsona egongo dira. Simulazioan PPAk, Algeposako operadoreak, suhiltzaileek, Osakidetzak, DYAk, Kaizaingoak eta kanpoko larrialdi zerbitzuek hartuko dute parte. Simulazio horren helburu nagusiak dira egoera horien aurrean koordinazioa eta salgai arriskutsuekin izandako gorabeheren aurrean jarduteko protokoloa gauzatzea.
Bigarrena 15:00etan izango da, eta jatorri ezezaguneko hidrokarburoen isurketa simulatuko da. Itsasoaren egoeraren arabera, barruko edo kanpoko uretan egingo da. Simulazioan Kaizaingoak, amarratzaileek, praktikoek, atoiontziek, Gurutze Gorriak, Ertzaintzak, Guardia Zibilak eta Itsas Salbamenduak hartuko dute parte. Bigarren simulazioaren xedeak dira euste hesien erabilera egiaztatzea, lehorreko eta itsasoko ekipoak koordinatzea, sakonera txikiko maniobrak egitea eta marearen konpentsatzaileak ebaluatzea.
Simulazioek eragingo dituzten sirena eta ekipoen mugimenduak erabat kontrolatuta egongo direla zehaztu du PPAk. Horretarako, emakidadunak, operadoreak eta larrialdi zerbitzuak prestakuntza saioak egiten ari dira azken egunetan, prest egon daitezen.
