Euskaraldian, Xoxolurrekin Jaizkibelgo txokoen izenak ezagutzera
Xoxolurren irteera baten artxiboko irudia.Xoxolur Euskaraldiarekin bat egin du Xoxolur Mendi Klubak. Edo Euskaraldiak Xoxolurrekin, agian. Izan ere, herriko mendizaleen egunerokoan eta irteeretan euskara dute hizkuntza, horren erabilera familia giroan sustatuz han eta hemen. Beraz, hurrengo irteeran ez da berritasuna izango euskararen erabilera; bai, ordea, formatua. Hilaren 25ean, Euskaraldiaren azken egunean, egingo dute herriko mendizaleek sasoiko zortzigarren irteera, Jaizkibelera.
Formatu berezikoa izango da 25ekoa. Izan ere, haien asmoa da mendia eta euskara uztartuz Jaizkibelgo 11 txoko eta horien izena eta izana ezagutzea. 11 bide, 11 txoko, 11 euskal izen leloduna da txangoa. Mendia euskaraz ezagutzeko aukera, beraz, proposamenaren muinean.
Irteerarako izena aurrez eman behar da Xoxolurren posta elektronikora mezua bidalita; hilaren 22ra arteko epea (osteguna da) dago horretarako.
Igandeko 09:00etan irtengo da euskaltzaleen espedizioa Jaizkibel aldera, Gurutze Santuaren plazatik. Goizeko ibilbidea da, eta gaztetxoenen erritmoa errespetatuko da. Arropa erosoa, hamaiketakoa eta ura eramatea aholkatu dute.
Jaizkibelgo osteratxoa egin ondoren herrira jaitsi, eta Euskaraldiaren harira antolatutako beste ekitaldiekin bat egingo dute: bazkari autogestionatua egingo da plazan, eta arratsaldean (17:00), Imuntzo eta Belokirekin erromeria.
Igandea baino lehen, ordea, badira Euskaraldiarekin lotutako ekitaldi gehiago Lezon. Beheko zerrendakoak dira.
Lezoko Euskaraldia. Egitaraua.
Hilak 20, asteartea
- 18:30ean, Gurutze Santuaren plazan, euskara ikasleei omenaldia.
Hilak 21, asteazkena
- 18:15ean, Andreone Udal Liburutegian, Txantxangorria txantxate ipuin kontaketa Ixabel Agirresaroberen eskutik.
Hilak 23, ostirala
- 21:30ean, Ibaiondon, kantu afaria. Txartelak Tiñelun eta Txingurrin salgai.
