'Pasaian Erosi' kanpaina, tokiko merkataritza sustatzeko
Udalak eta Laurak Batek ondutako kanpaina ekainaren 1etik 30era bitartean gauzatuko da. Establezimenduak hilaren 25era arte batu ahal izango dira iniziatibara.
Pasaiako Udalak eta Laurak Bat Pasaiako merkataritza, ostalaritza eta zerbitzuen elkarteak Pasaian Erosi kanpaina aurkeztu dute. Iniziatibaren helburuak dira herritarrek Pasaiako establezimenduetan kontsumitu dezaten sustatzea, herritarrei laguntzea eta tokiko merkataritza, ostalaritza eta zerbitzuak indartzea. Udalerrian kontsumitzea xede duen kanpaina ekainaren 1etik 30era bitartean gauzatuko da.
Egitasmo horri esker, ekainaren 1etik aurrera, deskontu bonuak eskuratu ahal izango dira, eta 10 euroko prezioan 15 euroko erosketak egiteko aukera izango dute pasaitarrek. Kanpainara atxikita dauden establezimenduek QR kodea duen kartel bereizgarri bat izango dute, udalerriko zein establezimenduk parte hartzen duten jakiteko. Erosketak aldi batean egin behar direla jakinarazi dute sustatzaileek, bonuak erosten diren establezimenduetan. Gehienez lau bonu erosi ahal izango dira NAN bakoitzeko.
Establezimenduak hilaren 25era arte batu ahal izango dira Pasaian Erosi kanpainara. Parte hartu nahi duten komertzioek inprimakia bete eta Laurak Bati igorri beharko diote, posta elektronikoz. Helbide elektroniko horretan, zalantzak ere argituko dituztela adierazi dute sustatzaileek. Sektoreko establezimendu gehienak Laurak Batekoak direnez, erakunde laguntzaile izendatu da, eta haiek kudeatuko dute bonuen koordinazioa, horien justifikazioa egiaztatu ahal izateko.
Kanpainara atxiki nahi duten establezimenduek baldintza hauek bete behar dituzte:
- Jendaurreko salmentarako establezimendua Pasaian egotea eta Pasaiako udalerrian ordaintzea JEZa.
- Pymea izatea, 10 langiletik beherako plantilla, eta urteko fakturazioa 1.000.000 eurotik beherakoa.
- Zerga betebeharretan eguneratuta egotea.
