HAPOaren partaidetza prozesua, urratsak egiten
Hilaren 1ean irekitako erakusketaz gain, ekintza osagarriak egingo ditu udalak, eta ingurumenaz, klima larrialdiaz, merkataritzaz edota etxebizitzaz hausnartzeko saioak egingo dira.
Pasaiako Udala HAPOaren erakustaldi fasean murgilduta dago. Hilaren 1ean hasi zen aurrerakina jendaurrean jarri eta herritarrek ekarpenak egiteko prozesua, eta udalak hainbat bide sortu eta aktibatu ditu ekarpen horiek jasotzeko. Orain, udalak HAPOaren baitako ekintza osagarri gehiago egitea erabaki duela adierazi du Iraitz Pazos Hirigintza eta Ingurumen zinegotziak: “Proiektuaren garrantzia eta hainbat gaietan izango duen inpaktuaz jabetuta, barrutiz barruti antolatutako partaidetza bideez gain, ekintza osagarri gehiago egitea erabaki dugu”.
Atzo ingurumena eta klima larrialdia lantzeko lan saio espezifiko bat egin zen San Pedroko Udal Aretoan. Hurrengo saioa ekainaren 4an izango da. Antxoko Kultur Etxeak etxebizitzaren, birdentsifikazioaren, erabilera aldaketen eta merkataritzaren lan saio bat jasoko du, 14:30ean. Udalak hurrengo galderen hausnarketa egingo dela aurreratu du: Etxebizitza beharren aurrean proposatu daitezkeen birdentsifikazio neurriek nola eragiten dute herrian? Zein ondorio izan ditzakete merkataritzan? Zer eduki behar da kontuan eta nola orekatu behar ditugu tokiko merkataritzaren sustapena eta etxebizitza beharrak?
Hirigintza Aholku Kontseilua udalak herritarren partaidetza bermatzeko sortua duen legezko gune iraunkorra da, eta aurrerakinaren erakustaldi fasean bere ekarpena “ezinbestekoa” izango dela baietsi du udal erakundeak. Aholku Kontseiluaren saioa ekainaren bigarren hamabostaldian izango da. Udalak aurrerago zehaztuko ditu data zehatza, ordutegia eta lekua. Lan saio guztietara herritar guztiak gonbidatuak daudela nabarmendu du udalak.
HAPOaren erakustaldi fasearen harira, udalak erakusketa finkoak antolatu ditu barruti guztietan. Trintxerpen jada izan da erakusketa. Momentu honetan, eta hilaren 30era arte, San Pedroko Udal Aretoan bisitatu ahal izango da HAPOaren prozesua ardatz duen erakusketa. Ekainaren 1etik 13ra bitartean Antxoko Kultur Etxean egongo da ikusgai. Azkenik, ekainaren 13tik 30era, Donibaneko Juanba Berasategi aretoan izango da erakusketa. Udalak gogorarazi du erakusketa horiek eraikinak irekita dauden ordutegietan bisita daitezkeela.
Horrez gain, aditu batek bisita gidatuak egingo ditu HAPOaren berri emateko, euskaraz eta gaztelaniaz. Trintxerpeko bisita gidatua hilaren 8an egin zen. San Pedrokoa hilaren 29an izango da, 17:30ean. Antxokoa, aldiz, ekainaren 4an egingo da, hori ere 17:30ean. Azkenik, Donibaneko bisita gidatua ekainaren 18an izango da, 17:30ean. Bisita gidatuez gain, bi informazio hitzaldi ondu dira, elebitan, eta horietan ere partaidetza tailerrak egingo dira. Trintxerpekoa egina dago jada. Bigarren informazio hitzaldia Antxoko Kultur Etxean izango da, ekainaren 4an, 19:00etan.
