Gaza babesteko "premiazko neurriak" eskatu ditu Lezoko PSE-EEk
Talde sozialistak herri palestinarraren aldeko mozioa aurkeztu du: "Indarkeria bukatzeko eta estatu palestinarra aitortzeko unea da".
Ume bat, Gazan, Israelek eragindako suntsiketari begira.'aldeasinfantiles.es' Lezoko PSE-EEk mozioa erregistratu du udaletxean hurrengo udalbatzarrean azter dadin. “Gazako krisi humanitarioaren” aurrean udalak ere neurriak har ditzala eskatzeko mozioa da, “premiazko neurriak” eskatzeko. Joxean Sanchez udaleko sozialisten eleduna: “Gerra indarkeria modurik beldurgarri eta suntsitzaileena da, eta indarkeria bukatzeko eta estatu palestinarra aitortzeko unea da, berreraikuntzan lagunduz”.
PSE-EEk, mozioa aurkezteko testuan jaso du urtebete baino gehiago dela Gaza “heriotza eta suntsipen maila pentsaezinaren lekuko” dela: Israelek Gazako palestinarren kontra egindako eraso bortitzak dozenaka mila pertsona hil ditu, familia osoak desagerrarazi, auzoak suntsitu, azpiegiturak desegin, eta 1,9 milioi palestinar lekualdatu. Hori guztia “aurrekaririk gabeko hondamendi humanitarioa” dela azaldu du Joxean Sanchezek: “Are gehiago larriagotu da, NBEk ohartarazi du 14.000 umek desnutrizio larria dutela zerrendan”.
Argudioak horiek izanda, honakoak dira Lezoko PSE-EEk aurkeztutako mozioaren barruan dauden puntuak, hitzez hitz:
- Gazako biztanleria zibil palestinarraren aurka egindako genozidioa irmo eta ñabardurarik gabe gaitzestea.
- Berehalako su-eten iraunkorra, indar militarrak lurralde okupatuetatik erretiratzea eta nazioarteko zuzenbide humanitarioa erabat errespetatzea eskatzea.
- Gertakarien larritasunaren aurrean jarduteko eta Israelekin duen akordio komertzial eta politikoa berrikusteko eskatzen diogu Europako Batasunari.
- Gazako Zerrendan laguntza humanitarioa sartzeko bide seguruak berma ditzatela, lurralde horren kontrako legez kanpoko blokeoa kentzea eta Palestinako Lurralde Okupatuaren okupazioa amaitzea, 2024ko uztaileko Nazioarteko Justizia Gortearen iritzi aholku emailea praktikan jarriz, zeinek Israelek Gaza eta Zisjordania ekialdeko (Jerusalem barne), legez kanpokotzat jotzen zituen.
- Lezoko Udaletik, Palestinak Ekialde Hurbilean dituen errefuxiatuentzako Nazio Batuen Agentziaren (UNRWA) premiazko eta beharrezko lana babesten dugu, larrialdi humanitarioko arrazoiak oinarri hartuta. UNRWAri lan egitea galaraztea bi milioi pertsona baino gehiagoren bizitzaren aurkako eraso zuzena da, eta palestinarren etorkizuna kaltetzen du.
- Europako Batasunak bere eragina eta boterea giza eskubideen, justiziaren eta kontuak ematearen alde erabiltzea. Zehazki, Genevako Hitzarmenak errespetatzen direla bermatzea. Hitzarmen horiek, gutxienez, eskatzen dute estatu guztiek eten ditzatela gatazkan parte hartzen duten aldeei egiten zaizkien arma transferentziak, nazioarteko zuzenbidea urratzeagatik kontuak ematea bermatzeko lankidetzan aritzea eta nazioarteko erakundeei eta mekanismoei laguntzea eskatzen dute, Nazioarteko Zigor Gorteak eta NBEren Ikerketa Batzordeak Palestinako Lurralde Okupatuari buruz egindako ikerketak barne.
- Europar Batasunak Gazan presentzia militar iraunkorra ezartzeko, mugak aldatzeko edo palestinarrak Gaza edo Zisjordaniatik kanporatzeko edozein ahaleginen aurka agertzea, eta nahitaezko lekualdaketa hori Genevako Laugarren Hitzarmenaren urraketa larria dela eta gerrako krimena dela onartzea.
- Lezoko herriak elkartasun aktiboa adieraztea Palestinako herriarekiko eta munduko gerren eta indarkeria militaristaren biktima guztiekiko.
- Akordio honen berri ematea Espainiako Gobernuko Presidentetzari, Espainiako Kanpo Arazoetako Ministerioari, Europako Parlamentuari, Palestinako Errefuxiatuentzako Nazio Batuen Agentziari (UNRWA) eta gizarte eta giza eskubideen aldeko erakundeei.
