Elkartasunak mugak hautsi ditu
Larunbatean burutu zuen Arkaitz 'Kalu' Erize lezoarrak Mugak Gaindituz erronka. Haur minbizidunen errealitatea lehen lerrora ekarri zuen.
Mugak hausteko eguna izan zen larunbatekoa. Zentzu askotan. Izan ere, Arkaitz Kalu Erize lezoarrak Baiona eta Lezo arteko korrikaldi erraldoia egin zuen goizaldetik arratsaldera, Aspanogi Gipuzkoako Haur Minbizidunen Familien Elkartearen alde. Elkartasunak mugarik ez duela azaldu zuen erronka aurkeztu zuenean, eta hori adierazi zuen larunbatean egin zuen kilometro bakoitzean. Lezon bukatu zuen, bere herrian, erronka: bete-bete zen Gurutze Santuaren plazan esan zuen elkartasunaren mugak lehenik norbanakoetatik hautsi behar direla, komunitatean eragiteko. Hura izan zen bere nahia: bere mugak zeharkatu, bidezko kausa baten alde: haur minbizidunen errealitatea lehen lerrora ekarri zuen.
Baionan lasterka hasi zenetik beti izan zituen laguntzaileak Erizek. Ez zen bakarrik izan erronka betetzeko zereginean. Hala, Lapurdiko kostalde osoa zeharkatu, Hendaiatik Irunerako zubia pasa, eta Hondarribitik hasita Jaizkibel zeharkatu zuen Donibaneraino iristeko. Ordura arte goiz-eguerdi osoan izan zituen bidelagunak lezoarrak, baina Pasaian zela biderkatu egin ziren.
Izan ere, Donibanen jada herritar mordoska zituen zain lasterkariak. Motoran San Pedrora para, eta han hasi zen burrunba: Hijos de Ruta motorzaleen taldeko dozenaka kide zain zituen, San Pedrotik Lezorako bidea elkarrekin egiteko. Ikusgarria izan zen korrikalarien eta motorren arteko sinbiosia. Hala, San Pedro, Trintxerpe, Antxo eta Errenteria-Orereta pasa, eta apoteosia izan zen Lezoko Gurutze Santuaren plazan bizitakoa. Herritarrek orroka eta txaloka jaso zuten erronkazalea; Erizek, hunkituta, esker mezuak eta besarkadak banatu zituen han eta hemen.
Aspanogiren aldekoa izan da oraingoan Erizeren erronka. Ondoan izan ditu, baina, Markelen Irria, Juneren Hegoak eta Trikaia korrikalari taldeko kideak antolaketa lanean. Lezoko Udalaren babesa ere bazuen elkartasun jarduerak.
Erizek plazan hitz egin ondoren, festak jarraitu zuen. Izan ere, Aspanogiren aldeko hainbat ekintza zeudelako antolatuak herrian. Eguraldi ederra lagun, erronka eta herri giroa sekulakoak izan ziren.
Ondoko irudiak HITZAk antolatzaileen bidez eskuratutakoak dira. Erronkaren azken zatikoak dira, San Pedrotik Lezorako bidekoak.
