San Juan, trainerilletan gorenean
Trainerillen Espainiako Txapelketan urrea eta zilarra bere egin dituzte arraunlari arrosek Gazte Mailako mutilen eta nesken kategorietan.
Galizian arraunean izan diren sanjuandarrak eta entrenatzaileak atzo.San Juan-Koxtape Sasoi izugarri ona egin dute San Juan-Koxtape Arraun Elkarteko trainerillek, bereziki Gazte Mailakoek. Hori berresteko asteburua izan da joan berri dena: Galiziako A Pobra do Caramiñal herrian jokatu den Espainiako Trainerilla Txapelketan urrezkoa lortu dute Gazte Mailako mutilen ontzikoek, eta zilarrezkoa maila horretako neskek. Galiziatik Euskal Herrirako bidea, beraz, nekeak jota baina gozo egin zuten atzo sanjuandarrek.
Bi metal horiekin, medailen araberako sailkapenean lehena izan da Donibaneko kluba, bi dominarekin Tolosaldearekin berdinduta sailkapen horretan.
Urrea lortu zuten Gazte Mailako mutilek zazpi segundoko aldea atera zioten igandeko finalean bigarren izan zen Ondarroako trainerillari. Hirugarren Isuntza izan zen, eta laugarren Zierbena. Honakoa arrosen eskifaia: Markel Salaberria Novoa, Lander Rojas Barbara, Lander Etxabe Etxeberria, Eneko Jauregi Berrotaran, Hugo Ogallar Jimenez, Enaitz Alfonso Legorburu, eta Asier Iparragirre Martinez (lemazaina).
Neskek, ordea, Cabo Da Cruz izan zuten aurretik. Zortzi segundoko aldea izan zen urrezko izan ziren galiziarren eta sanjuandarren artean. Hirugarren Isuntza sailkatu zen, eta laugarren Mecos. Honakoa sanjuandarren eskifaia: Nahia Colmenar Justo, Katia Irazu Salaberria, Olaia Etxaide Agirre, Laia Gereño Legorburu, Elaia Arruti Irastorza, Izar Aranburu Mutiloa, eta Anertz Gereño Legorburu (lemazaina).
