Aurreskulari onenak, Lezokoak
Larunbatean jokatu zen Niessenen gipuzkoar erako Gazte Mailako VII. Aurresku Txapelketa. Hugo Haro eta Lur Lacasta lezoarrak, irabazle.
Lur Lacasta eta Hugo Aro lezoarrak, ohorezko aurreskua dantzan garaipena lortu ondoren.Gipuzkoako Euskal Dantzarien Biltzarra Dantza txapelketetan, zehazki txapelketa horietako txapelak janzten tradizio handiko herria da Lezo. Hori nabarmen agerian gelditu zen larunbatean Errenteria-Oreretako Niessen aretoan. Gipuzkoar erako Gazte Mailako VII. Aurresku Txapelketa Nagusia izan zen jokoan, eta albiste honen lehen karaktereetan nabari denez, lezoarrak izan ziren garaile lehian izan ziren bi kategorietan: A sailean (2015, 2016 eta 2017 urteetan jaiotakoak) Hugo Haro Martin izan zen garaile, eta B sailean (2015, 2016 eta 2017 urteetan jaiotakoak), berriz, Lur Lacasta Santisteban. Biak ala biak, lezoarrak. Zorionak biei!
Hori gutxi balitz, A sailekoen podiuma osatzen beste bi lezoar izan ziren, Gorane Villa Martinez eta Ane Perez Lizarazu hain zuzen ere. B sailean ere bigarren lezoar bat izan zen, Ixone Lorenzo Bergara zehazki.
Erein elkarteak eta Gipuzkoako Euskal Dantzarien Biltzarrak antolatu zuten larunbateko lehia. Albiste honetako informazioa zein argazkiak dantzarien elkargoari esker lortu ditu HITZAk. Hala, dantzariei doinua ematen Errenteriako Udal Txistulari Taldeko kideak izan ziren, eta dantzarien urrats bakoitza neurtzeko ardura (epaileak) Idoia Besadak (Pasaia), Jose Luis Vallejok (Tolosa), eta Maria Ferreirok (Elgoibar) izan zuten. Lan serio eta nekeza izan zen epaimahaikideena. Gainera, azken horiek puntuen banaketan eta deliberoan ziren bitartean Herri Arte Eskolako kideek emanaldia egin zuten.
Jarraian, bi sailetako lehenen sailkapenak.
A saila (2015, 2016 eta 2017 urteetan jaiotakoak)
- 1. Hugo Haro Martin (Lezo).
- 2. Gorane Villa Martinez (Lezo).
- 3. Ane Perez Lizarazu (Lezo)
- 4. Sara Escudero Mujika (Legazpi)
- 5. 6. Amaiur Iturbe Lopetegi (Lezo)
- Laia Illarreta Lopez (Legorreta)
- Ongien sailkatutako errenteriarrari sari berezia: Elene Pikabea Revuelta
B saila (2015, 2016 eta 2017 urteetan jaiotakoak)
- 1. Lur Lacasta Santisteban (Lezo)
- 2. Ixone Lorenzo Bergara (Lezo)
- 3. Nora Escudero Mujika (Legazpi)
- 4. June Osinalde Mendiola (Legazpi)
- 5. Nere Sarasola Tejeria (Zizurkil)
- 6. Izadi Arbelaitz Oliveri (Errenteria-Orereta)
- Ongien sailkatutako errenteriarrari sari berezia: Izadi Arbelaitz Oliveri
Niessenen dantzan izan ziren kide guztien talde irudia. Argazkia: Gipuzkoako Euskal Dantzarien Biltzarra.
