Maddi Goikoetxea Juanena eta Jon Gil Barreiro, Inspira Gazteak sarietako finalisten artean
Sari banaketa ekainaren 26an egingo dute Tolosako Topic museoan.
Maddi Goikoetxea Juanena eta Jon Gil Barreiro hamabost finalisten artean.Eitb.eus Inspira Gazteak, Kutxa Fundazioak antolatzen dituen sarietako finalistetako bi dira Maddi Goikoetxea Juanena eta Jon Gil Barreiro errenteriarrak. 120 proposamenetik gora jaso dituzte aurten eta horien artetik hamabost onenak aukeratu. Irabazleak, bost izango dira guztira; ekainaren 26an Tolosako Topicen egingo duten sari banaketan ezagutaraziko dituzte, eta 15.000 euro jasoko dituzte bere konpromisoarekin lotutako ibilbidearekin jarraitu ahal izateko.
Gizarte antropologia eta antzerkia ikasi ditu Goikoetxeak. 2020an itzuli zen Mexikotik Euskal Herrira, eta ordutik hezkuntza, osasuna, garapenerako lankidetza, euskalgintza eta kultura arloetan aritu da lanean tailerrak emanez eta proiektuak garatuz hainbat eragilerekin elkarlanean.
Bere ibilbidean nabarmentzekoak dira 2023an Martutene espetxean ziren emakume presoekin egindako Emakume sortzaileak barroteen atzean iniziatiba edo EHAZErekin batera Euskal Herriko antzerki eskolen inguruan egindako ikerketa eta ondorengo argitalpena: Ura jaten: antzerkia, prestigio soziala eta prekarietatea Euskal Herrian.
Gilek konpromisoari eta gizarte eraldaketari lotuta du ibilbidea. 16 urterekin hasi zen komunitate partaidetzan eta benetako jauzia Gurutze Gorrian hastea erabaki zuenean egin zuen duela hamarkada bat. Ordutik erakunde horretako hainbat kargutan aritu da, baita zuzendari ere, eta hainbat udal aholku kontseilutako kide ere bada.
Hitzetatik Ekintzatara iniziatibaren hirugarrena, udalerrian
Bestalde Kutxa Fundazioak abiatutako Hitzetatik Ekintzetara iniziatibaren hirugarrenak Errenteria-Oreretan hartuko du lur. Ekainaren 1ean bizi oholtza emanaldia ikusteko aukera izango da Herriko Plazan. Gertu Kultura, Gako eta DAB Bitartekaritza eragileek antolatuta, kulturak mugimenduan jartzea du helburu. Gorputzen eta dantzaren bidez, kultura aniztasuna balioan jarriko dute proposamen artistikoaren bidez. Atrezzo gisa erabiliko duten horma irudia osatuko dute emanaldia aurretik ikusleekin elkarlanean.
