Antxoko Sagardo Jaiaren 30. ekitaldia, larunbatean
Alkartasuna Euskal Dantza Taldeak antolatutako festa 18:00etan hasiko da, Gure Zumardian. Sagardoaz gain, jatekoen aukera asko izango dira.
Iazko Sagardo Jaiarena da irudia. Antxok ere izango du Sagardo Jaia, larunbatean (hilaren 31n). Aurten ere Alkartasuna Euskal Dantza Taldeak antolatu du sagarraren zukuari lotutako festa. 18:00etan hasiko dira txotx handiarekin. Gure Zumardian izango dira jarrita sagardotegiek emandako edaria banatzeko postuak. Pasai Antxoko Sagardo Jaiaren XXX. ekitaldia izango da larunbatekoa.
Sagardozaleei euren grina asetzeko aukera emateaz gainera, beste hainbat alorretan ere lanketa egin dute dantza talde antxotarreko kideek. Hala, tragoska eta tragoska artean pintxoa jateko aukera izanen dela jakinarazi dute. Formatu handiko pintxoak ere, hau da, otartekoak izango dira. Arratsalde pasan zehar ez da musikarik faltako Antxoko erdiguneko plazan.
Sagardoa bukatu ondoren ohikoa izaten da herriko tabernetan giroa sortzea. Hala izango da ere larunbatean.
