Hasi da itsas teknologien kongresua
Nazioartetik etorritako dozenaka adituk hasi dute Martech 2025 kongresua Donibanen. Tokiko agintariek egin diete harrera.
Hasi da itsas teknologiari lotutako Martecxh 2025 kongresua, Donibaneko Juanba Berasategi aretoan. Nazioartetik etorritako aditu multzo batek itsasoari lotutako hainba adarren gaineko gaiak izango dituzte hizpide AZTI zentro teknologikoak eta la Universitat Politecnica de Catalunya–BarcelonaTech-eko ikerketa-taldeak antolatutako Martech topaketan. Itsas berrikuntzaren ekosistemako hainbat eragileren laguntzaz, 100 aditu eta profesional baino gehiago bildu ditu, ikerketa-zentro, enpresa teknologiko eta erakunde ezberdinetatik etorriak. Helburua, AZTIk esan duenez, XXI. mendeko ozeanoen erronkei aurre egiteko zientziaren eta teknologiaren betebeharra aldarrikatzea izango da, “ekonomia urdin iraunkorra abian jartzeko beharra” nabarmenduz.
Teo Alberro Pasaiako alkateak eta Aizpea Otaegi Errenteriako alkate nahiz egungo Oarsoaldea Garapen Agentziako presidenteak egin diete harrera, hasierako hizketaldian, herrira etorri direnei. Biek ala biek Pasaiak eta eskualdeak itsasoarekin duten harremana nabarmendu dute, udalerrien historian pisu handiko sektorea baita. Dantzarien saioaren ondoren hasi dira kongresuaren barruko edukiak aztertzen.
Kongresuari buruz gehiago jakin nahi duenak balia dezala esteka hau. Behekoak, berriz, hasierako ekitaldiaren hainbat irudi dira, AZTIk ateratakoak.
